क्यानडाको संसदमा बहुमत ल्याउने ट्रुडोको योजना असफल, तर उनकै नेतृत्वमा अल्पमतको सरकार बन्ने
प्रकाशित मिति : आश्विन ५, २०७८ मंगलबार
कन्जरभेटिभ प्रतिस्पर्धी एरिन ओटोलका बिरुद्ध कडा प्रतिस्पर्धापछि क्यानडाका प्रधानमन्त्री जस्टिन ट्रुडोको लिबरल पार्टीले पुन अल्पमतको आगामी सरकार बनाउने भएको छ । चुनावमा संसदको तल्लो सदन हाउस अफ कमन्समा कुनै पनि पार्टीले बहुमत प्राप्त गर्न नसकेपछि ट्रुडोको पार्टीले अल्पमतको सरकार बनाउने भएको हो ।
क्यानेडियन संचारमाध्यमहरुका अनुशार ट्रुडोको पार्टीले सिट संख्यामा अल्पमत कायम गरेपनि ट्रुडोनै शक्तिमा रहनेछन् । सोमबारको चुनावले क्यानेडियन मतदाताहरुले ट्रुडोलाई शक्तिमा फर्काएका त छन् तर संसदमा उनले खोजिरहेको बहुमतलाई भने अस्वीकार गरेका छन् ।
औपचारिक रुपमा घोषणा गर्न बाँकी सोमबारको परिणाम अनुशार ट्रुडो प्रधानमन्त्रीकै रुपमा रहने संकेत गरेको छ । साथै आगामी अल्पसंख्यक सरकारको प्रमुखको रुपमा पनि उनी रहनेछन् । अगस्तमा आफ्नो लोकप्रियता बढेको देखिएपछि ट्रुडोले संसदमा सिटसंख्या बृद्धिको अपेक्षासहित आकस्मिक चुनावको घोषणा गरेका थिए ।
चुनावको उद्देश्य लिबरल पार्टीलाई मुलुकको नेतृत्व गर्नका लागि बलियो म्याण्डेड प्राप्त गर्नु थियो । तर उक्त उद्देश्यमा ट्रुडो असफल भएका छन् । ट्रुडोले सन् २०१९ को चुनावमा गुमाएको संसदीय बहुमत प्राप्त गर्ने प्रयास गरेपनि ट्रुडोको महत्वकांक्षालाई कतिपय क्यानेडियनहरुले अवशरवादका रुपमा व्याख्या गरेका थिए । तर ट्रुडोको चुनाव गराउनुको जुन उद्देश्य थियो, त्यो पूरा हुन भने सकेन ।
कतिपय मतहरु गणना हुन बाँकी रहेकै अवस्थामा चुनावी परिणामले पहिलेकै जस्तो अवस्था निर्माण गरेको छ । लिबरल पार्टीले १५६ सिट जितेको छ, जुन सन् २०१९ को चुनावको तुलनामा एकसिटले कम हो । कन्जरभेटिभ पार्टीले भने सन् २०१९ मै जस्तो १२१ सिट नै जितेको छ । संसदमा ब्लक क्युबेकोइस, न्यू डेमोक्रेटिक लगायतका दलको पनि उल्लेख्य सिट संख्या रहेको छ । कुल ३३८ सिट रहेको संसदमा बहुमतको सरकार बनाउनका लागि कुल १७० सिट प्राप्त गर्नुपर्छ । तर कुनैपनि पार्टीले यो सिट संख्या प्राप्त गर्न नसकेपछि अल्पमतको सरकार बन्ने भएको हो ।
संसदीय चुनावको यो परिणामका कारण आगामी दिनमा पनि जस्टिन टु्रडोले कुनै कानून पारित गराउनु परेको खण्डमा विपक्षी दलका सांसदहरुको समर्थन प्राप्त गर्नुपर्नेछ । मंगलबारको विजयी भाषणमा ट्रुडोले आफूले आकस्मिक चुनाव घोषणा गर्दा त्यसलाई कैयन क्यानेडियनहरुले मन नपराएको स्वीकार गरेका छन् ।