Follow @khasokhasmag

टेक्सास सर्भिस सेन्टरले रोजगारमा आधारित ग्रिनकार्ड र प्रिमियिम प्रोसेसमा ‘क्रेडिट कार्ड पेमेन्ट’ लिने


प्रकाशित मिति : आश्विन १, २०७८ शुक्रबार

टेक्सास सर्भिस सेन्टरले रोजगारमा आधारित ग्रिनकार्डका लागि दिइने आवेदन आई १४० र प्रिमियिम प्रोसेसका लागि दिइने आवेदन आई ९०७ मा क्रेडिट कार्ड पेमेन्ट लिने भएको छ । युएससीआईएसले क्रेडिट कार्ड पेमेन्ट कार्यक्रम टेक्सास सर्भिस सेन्टरमा पनि विस्तार गरेको हो ।

पेन्डिङ आवेदनलाई तीब्र गतिको आवेदनमा लैजानका लागि पनि फर्म आई ९०७ आवेदन दिंदा समेत क्रेडिट कार्डबाट रकम स्वीकार गरिने भएको छ । त्यसरी क्रेडिट कार्डबाट रकम बुझाउदा आवेदनका साथमा क्रेडिट कार्ड प्रयोगका लागि स्वीकृति दिने आवेदन जी १४५० फर्म समेत एकैसाथ भरेर पठाउनुपर्छ । उक्त फर्ममा क्रेडिट कार्डको विवरण उल्लेख गरेर पठाउनुपर्छ ।

अमेरिकी बैंकबाट जारी क्रेडिटकार्डबाट रकम तिर्न सकिनेछ भने क्रेडिट कार्डबाट रकम तिर्दा युएससीआईएसले अतिरिक्त शुल्क नलिने जनाएको छ । विदेशी बैंकले जारी गरेको क्रेडिट कार्ड भने स्वीकार नगर्ने युएससीआईएसले स्पष्ट पारेको छ । युएससीआईएसको नेब्रास्का सर्भिस सेन्टरमा यु भिसा आवेदनका सन्दर्भमा ग्रिनकार्ड आवेदन आई ४८५ फाइल गर्दा पनि क्रेडिट कार्डबाट रकम तिर्न सकिने व्यवस्था सुरुवात गरिएकोमा त्यसलाई विस्तार गरिएको हो ।

क्रेडिट कार्डबाट रकम तिर्नसकिने कार्यक्रम मे ३ मा नेब्रास्का सर्भिस सेन्टरमा सुरु गरिएको थियो । सुरुमा यु भिसाका ग्रिनकार्ड आवेदन आई ४८५ का लागि स्वीकार गरिएपनि पछि जुलाई १९ बाट नेब्रास्का सर्भिस सेन्टरमा रोजगारमा आधारित ग्रिनकार्ड आवेदन आई १४० र प्रिमियिम प्रोसेस आवेदन आई ९०७ का सन्दर्भमा पनि विस्तार गरिएको थियो ।

कुनै आवेदनमा प्रिमियिम प्रोसेस गरेपछि युएससीआइएसले त्यसबारे छिटो निर्णय दिन्छ । गैरआप्रवासी कामदारका लागि दिइने आवेदन आई १२९ र रोजगारमा आधारित ग्रिनकार्डका लागि दिइने आवेदन आई १४० मा प्रिमियम प्रोसेसको सुविधा रहेको छ । प्रिमियम प्रोसेस अनुरोध गरेको आवेदनले या त १५ दिनभित्र निर्णय प्राप्त गर्छन्, या त उक्त समयभित्र निर्णय दिन नसकेमा युएससीआईएसले रकम फिर्ता गर्छ ।

तर क्रेडिट कार्डबाट रकम तिर्दा कुनै कारणवश पहिलोपटक ट्रान्जेक्सन अस्वीकृत भएमा युएससीआईएसले दोश्रोपटक प्रयास गर्दैन । जसका कारण कुनै प्राविधिक कारण वा युएससीआईएसकै गल्तीले ट्रान्जेक्सन स्वीकृत नभएको खण्डमा समेत आवेदन फिर्ता आउने गरेको गुनासो सेवाग्राहीहरुको रहेको छ ।

लकबक्समा फाइल गरेका आवेदनका सन्दर्भमा भने क्रेडिट कार्डबाट पेमेन्ट गर्न सकिने सुविधा पहिलेदेखि नै रहदै आएको छ ।

युएससीआइएसको लकबक्समा फाइल गरेका कुनकुन आवेदनमा शुल्क क्रेडिट कार्डबाट तिर्न सकिन्छ ? थाहा पाउन यहाँ क्लीक गर्नुहोला ।

 

 

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com