कोरोनाबिरुद्धको भ्याक्सिन अनिवार्य बनाइएपछि अमेरिकामा धार्मिक कारण देखाउदै नलगाउनेहरु बढ्दो
प्रकाशित मिति : भाद्र ३१, २०७८ बिहीबार
अमेरिकामा कोरोनाबिरुद्धको भ्याक्सिन अनिवार्य बनाइएपछि अमेरिकामा धार्मिक कारण देखाउदै भ्याक्सिन नलगाउनेहरु बढ्दो रहेका छन् । राष्ट्रपति जो बाइडेनले सघीय कर्मचारीहरुकासाथै एकसयभन्दा धेरै कामदार हुने विजनेशमा काम गर्नेहरुलाई भ्याक्सिन अनिवार्यको नियम घोषणा गरेका थिए । साथै कैयन राज्य र सिटीहरुले पनि कर्मचारीहरुका लागि भ्याक्सिन अनिवार्यको नियम घोषणा गरेका छन् ।
धार्मिक कारणले भ्याक्सिन लगाउन नमिल्नेहरुलाई छुट दिइएपछि भ्याक्सिन नलगाएकाहरुले धार्मिक कारण देखाउन थालेका हुन् । लस एन्जलस प्रहरी विभागमा काम गर्ने झण्डै २६ सयले धार्मिक कारणले आफूहरुले भ्याक्सिन लगाउन नसक्ने कारण देखाएका छन् । वासिंटन राज्यमा भने हजारौं राज्यका कर्मचारीहरुले पनि धार्मिक कारणले लगाउन नमिल्ने भन्दै भ्याक्सिन लगाउन नमानेको जनाइएको छ ।
अर्कान्सासको एउटा अस्पतालमा भने भ्याक्सिन नगाउने कैयन कर्मचारीहरुले धार्मिक छुटको माग गरेका छन् । विभिन्न भ्याक्सिनहरुमा दिइदै आएको धार्मिक छुटको नियमलाई कोरोनाबिरुद्धको भ्याक्सिनका सन्दर्भमा लुपहोलका रुपमा दुरुपयोग गर्ने क्रम अमेरिकामा बढेको हो । एकसय मिलियन कर्मचारीहरु प्रभावित हुनेगरी बाइडेनले भ्याक्सिन अनिवार्यताको नियम घोषणा गरेपछि धार्मिक कारणको लुपहोल दुरुपयोग गर्नेहरु बढेका हुन् ।
बाइडेन प्रशासनले धार्मिक छुटको दुरुपयोग हुनसक्ने स्वीकार गरेको छ । तर पनि भ्याक्सिन लगाउने दरमा थोरैमात्र बृद्धि भएपनि मान्छेको जीवन बचाउनेमा बाइडेन प्रशासनको विश्वास रहेको छ । युनियन अधिकारीहरुले ठूलो संख्यामा संघीय कर्मचारीहरुबाट पनि धार्मिक छुटको माग आएको बताएपनि कतिजनाले त्यस्तो माग गरेका छन् भन्ने स्पष्ट छैन ।