Follow @khasokhasmag

उष्ण कटबन्धीय तूफान निकोलशले टेक्सासमा २० इन्चसम्म बर्षा गराउने चेतावनी, ह्युस्टनमा तयारी


प्रकाशित मिति : भाद्र २८, २०७८ सोमबार

सोमबार टेक्सास गल्फ कोस्ट र दक्षिण पश्चिम लुजियाना क्षेत्र उष्ण कटबन्धीय तूफान निकोलशबाट खतरामा रहेका छन् । राष्ट्रिय मौषम सेवाले तूफान निकोलशका कारण ज्यानै जोखिममा पार्ने तूफान, अलग्गै भूमरी र कतिपय स्थानहरुमा २० इन्चसम्म भारी वर्षाको सम्भावना रहेको चेतावनी दिएको छ ।

निकोलशले उत्तर पश्चिम गल्फ कोस्टमा पहिरो ल्याउनुभन्दा अगाडि बलियो तूफानको रुप धारण गर्नसक्ने राष्ट्रिय हरिकेन केन्द्रले चेतावनी दिएको छ । यो आँधी केन्द्रमा ११५ माइल प्रतिघण्टासम्मको गतिमा आउनसक्ने अनुमान गरिएको छ । ह्युस्टन मेट्रो एरियादेखि विभिन्न स्थानहरुका लागि चेतावनीहरु जारी गरिएको छ । यो क्षेत्र ४ बर्ष अगाडि हरिकेन हार्भी र सन् २०१९ मा इमेल्दाबाट प्रभावित भएको थियो ।

यो समाचार तयार पार्दासम्म निकोलश पश्चिमी गल्फ अफ मेक्सिकोमा ४५ माइल प्रतिघण्टाको गतिमा रहेको छ । निकोलशले केहीदिनसम्म मध्य र माथिल्लो टेक्सासको तटीय क्षेत्रमा बाढी ल्याउनसक्ने देखिएको छ । लुजियानामा पनि १० इन्चसम्म बर्षा हुने अनुमान गरिएको छ ।

निकोलशका कारण पूर्वतयारीका रुपमा ह्युस्टन स्वतन्त्र स्कुल डिस्ट्रिक्टमा मंगलबारका लागि कक्षाहरु स्थगित गरिएका छन् । सोमबार भने स्कुलहरु नियमित संचालनमा रहेको जनाइएको छ । ह्युस्टनमा सम्भावित क्षति कम गर्न विभिन्न स्थानमा अवरोधहरु राखिएको छ भने पानीको उच्च तहमा पनि उद्दार गर्नसक्ने गाडीहरु तयारी अवस्थामा राखिएको छ ।

सेप्टेम्बर १२ मा गल्फ अफ मेक्सिकोमा लिइएको तस्वीर ।

यसैबीच लुजियानामा निकोलश आउनु अगाडि राज्य संकटकालको घोषणा गरिएको छ । हरिकेन आइदाबाट थलिएर उठ्ने प्रयास गरिरहँदा निकोलश तूफानले बाढी आउनसक्ने भन्दै गभर्नर जोन बेल एडवार्डले संकटकालको घोषणा गरेका हुन् ।

निकोलश तूफान दक्षिणी गल्फ अफ मेक्सिकोमा निर्माण भएको हो भने बलियो हुँदै अगाडि बढेको छ । लुजियानाका केही भागमा निकोलशका कारण बाढी र भारी बर्षाको अनुमान गरिएको छ ।

साताको मध्यसम्म यस्तो सम्भावना रहेको भन्दै संकटकालको घोषणा गरिएको हो । सन् २०२० मा हरिकेन लाउराले प्रभाव पारेको क्षेत्रमा नै निकोलश तूफानको प्रभाव पर्ने अनुमान गरिएको छ भने हालै आइदाले प्रभाव पारेको स्थानमा भारी बर्षा हुने अनुमान छ ।

यो तूफानका कारण केही स्थानमा विद्युत आपूर्तिमा अवरोध आउने गभर्नर एडवार्डले चेतावनी दिएका छन् । निकोलश सन् २०२१ मा एटलान्टिकको १४ औं तूफान हो । आइदा यो सिजनकै सबैभन्दा खराब आँधी थियाृ, जसले न्युयोर्क, न्युजर्सी लगायतका विभिन्न राजयमा झण्डै ५० जनाको ज्यान लिएको थियो । न्युयोर्कमा आइदाका कारण आएको बाढीले ३ जना नेपालीको मृत्यु भएको थियो ।

कभर फोटोमा सोमबार विहान गल्फ अफ मेक्सिकोमा लिइएको निकोलशको स्याटेलाइट तस्वीर ।

 

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com