काबुलबाट दोश्रो कमर्शियल अन्तर्राष्ट्रिय उडान, १ सय बढी विदेशीले छाडे अफगानिस्तान
प्रकाशित मिति : भाद्र २५, २०७८ शुक्रबार
काबुलबाट तालिवानको स्वीकृतिमा दोश्रो कमर्शियल उडान भएको छ । कतार एयरवेजको उडानमार्फत १ सय भन्दा धेरै विदेशीहरुले अफगानिस्तान छाडेको भोलिपल्ट यो उडान भएको हो । दोश्रो उडानमा कतिजना यात्रुहरु थिए भन्नेबारे स्पष्ट छैन ।
बिहिबारमात्र तालिवानले अफगानिस्तानमा नियन्त्रण कायम गरेयताकै पहिलो कमर्शियल उडान भएको थियो । तालिवानले स्वीकृति प्रदान गरेपछि काबुलबाट कतार एयरलाइन्सको बोइङ ७७७ ले उडान भरेको थियो ।
तालिवानले झण्डै १५० अमेरिकनहरुसहित २ सयजना यात्रुहरुलाई अफगानिस्तानबाट बाहिर जानका लागि स्वीकृति प्रदान गरेको थियो । जसमध्ये आधाभन्दा धेरैले उक्त उडानमार्फत बिहिबार अफगानिस्तान छाडेको जनाइएको छ ।
तालिवानका कार्यवाहक विदेश मन्त्री अमिर खान मुटाकीले कतारका विशेष दूतलाई काबुल अन्तर्राष्ट्रिय विमानस्थलबाट उडान सुचारु गर्नका लागि कतारले गरेको प्रयासका लागि धन्यवाद दिए । काबुलको विमानस्थल ९० प्रतिशत ठीकठाक बनाइएको छ भने केही प्राविधिक कुराहरु बनाउन भने केही समय लाग्ने बताइएको छ ।
अफगानिस्तानका लागि अमेरिकाका विशेष प्रतिनिधि जाल्मे खालिलजादले तालिवानलाई बाह्य उडानका लागि अनुमति दिन दवाव दिएपछि तालिवानहरुले २ सय जनालाई चार्टड उडानमार्फत अफागानिस्तान छाड्न अनुमति दिएका थिए । यसअगाडि अमेरिकी विदेशमन्त्री एन्टोनी ब्लींकेनले तालिवानले अनुमति नदिएका कारण अमेरिकनहरु चार्टड उडानमा अफगानिस्तान छाड्न नसकेको आरोप लगाएका थिए ।