शुक्रबारदेखि सार्वजनिक यातायातमा यात्रा गर्दा मास्क नलगाउनेलाई ३ हजार डलरसम्म जरिवाना
प्रकाशित मिति : भाद्र २४, २०७८ बिहीबार
शुक्रबारदेखि अमेरिकामा सार्वजनिक यातायातमा यात्रा गर्दा मास्क नलगाउनेलाई ३ हजार डलरसम्म जरिवाना गरिने भएको छ । आज अमेरिकाको डिपार्टमेन्ट अफ होमल्याण्ड सेक्युरिटीको टीएसएले मास्क अनिवार्यताको संघीय नियम उल्लंघन गर्नेहरुका लागि जरिवाना बढाएको हो ।
विमानस्थल, व्यवसायिक विमानहरु, रेलरोड, बस सेवा र अन्य सार्वजनिक यातायातहरुमा यो नियम लागु हुनेछ । गत फेबु्रअरी २ मा टीएसएबाट जारी मास्क अनिवार्यताको नियम सन् २०२२ को जनवरी १८ सम्म लागु हुने जनाइएको छ ।
पहिलो पटक मास्क अनिवार्यताको नियम उल्लंघन गर्नेलाई ५ सय डलरदेखि १ हजार डलरसम्म जरिवाना गरिनेछ भने दोश्रोपटक उल्लंघन गर्नेलाई १ हजार डलरदेखि ३ हजार डलरसम्म जरिवाना गरिने भएको छ ।
मास्क लगाउँदा यात्रा गरिरहेका व्यक्ति र कर्मचारीहरुलाई सुरक्षित बनाउने तथा सार्वजनिक स्वास्थ्यको संरक्षणका लागि आवश्यक भएसम्म मास्क अनिवार्यताको नियम लागु गरिरहने डिपार्टमेन्ट अफ होमल्याण्ड सेक्युरिटीका सेक्रेटरी अलेहान्द्रो मेयरकासले बताएका छन् ।
टीएसले जारी गरेको यो नयाँ जरिवानाको नियम संघीय उड्ययन प्रशासनको जरिवानाको नियमभन्दा फरक हो । संघीय उड्ययन प्रशासनले मास्क नलगाएर असुरक्षित व्यवहार गर्नेहरुका लागि छुट्टै जरिवानाको व्यवस्था गरेको छ ।