टेक्सासमा चुनावबारे नयाँ कानून, यस्ता छन् ७ परिवर्तन
प्रकाशित मिति : भाद्र २२, २०७८ मंगलबार
टेक्सासका गभर्नर ग्रेग अबोटले चुनावबारेको नयाँ कानूनमा हस्ताक्षर गरेका छन् । रिपब्लिकन बाहुल्य रहेको राज्यको संसदबाट पारित भइसकेपछि गभर्नर अबोटले नयाँ प्रतिबन्धहरुसहितको उक्त कानूनमा हस्ताक्षर गरेका हुन् ।
नयाँ कानूनले २४ घण्टासम्म अग्रिम मतदान गर्न पाइने प्रावधानमा प्रतिबन्ध लगाएको छ । सन् २०२० मा ह्यारिस काउन्टीमा २४ घण्टासम्म मतदान गर्न पाउनेगरी अग्रिम मतदानको व्यवस्था गरिएको थियो । नयाँ कानून अनुशार अब काउन्टीहरुले विहान ६ बजेदेखि बेलुका १० बजेसम्ममात्र अग्रिम मतदान गराउन सक्नेछन् ।
त्यस्तै नयाँ कानूनले ड्राइभ थु्र मतदानमा पनि प्रतिबन्ध लगाएको छ । सन् २०२० मा कोरोना महामारीका कारण ड्राइभ थु्र मतदानलाई समेत मान्यता दिइएकोमा अब त्यस्तो प्रकारको मतदानलाई टेक्सासमा प्रतिबन्ध लगाइएको छ । सन् २०२० को राष्ट्रपति चुनावमा टेक्सासको ह्यारिक काउन्टीका १० वटा मतदान केन्द्रमा १ लाख २७ हजारले मतदान गरेका थिए ।
अब हुलाकमार्फत मतदान गर्ने टेक्सासबासीहरुले नयाँ कानून अनुशार ड्राइभर लाइसेन्स नम्बर वा सोसल सेक्युरिटी नम्बरको पछिल्लो ४ अंक प्रदान गर्नुपर्नेछ । एकपटक अनुपस्थीत मतपत्र आवेदन फर्ममा र अर्कोपटक मतदान गरेर हुलाकबाट मतपत्र पठाउँदा यो नम्बर प्रदान गर्नुपर्नेछ । अहिलेसम्म हस्ताक्षरबाट व्यक्तिको परिचय सुनिश्चित गरिदै आएकोमा अब यी नम्बरबाट गरिनेछ । ६५ बर्षकाटेकाहरु, चुनावको दिनमा काउन्टीमा उपस्थीत हुन नसक्नेहरु, मतदान स्थलमा उपस्थीत भएर मतदान गर्न नसक्ने अपांगता भएका वा बिरामी भएकाहरुले हुलाकमार्फत मतपत्र पठाएर मतदान गर्न सक्छन् ।
त्यस्तै अनुरोध नगरेका मतदाताहरुलाई सार्वजनिक अधिकारीहरुले अबदेखि हुलाकबाट मतपत्रका लागि आवेदन पठाउन पाउनेछैनन् । त्यस्तै कसैलाई अनुरोध पछि पठाइएका हुलाकमार्फत मतपत्रका लागि आवेदनमा पनि कुनै विवरण पहिले नै भरेर पठाउन पाइनेछैन । त्यस्तै अनुरोध नगरिएका अनुपस्थीत मतपत्रहरुपनि कसैलाई वितरण गर्न पाइनेछैन । ह्यारिस काउन्टीले सन् २०२० को चुनावमा सबै मतदाताहरुलाई मतपत्रको अनुरोधका लागि आवेदन पठाएको थियो । कतिपय काउन्टीहरुले ६५ बर्षमाथिका सबै मतदाताहरुलाई अनुपस्थीत मतपत्रका लागि आवेदन पठाएका थिए ।
त्यस्तै नयाँ कानून अनुशार मतदान केन्द्रको अवलोकनमा खटिने राजनीतिक दलका प्रतिनिधिहरुलाई मतदान केन्द्रहरुमा स्वतन्त्र आवतजावतका लागि रोक लगाइनेछैन । मतदाताले मतदान गरेको देखिने अवस्थामा बाहेक उनीहरु मतदान स्थलमा आवतजावत गर्न पाउनेछन् । उनीहरु मतदान स्थलको नजिक बसेर वा उभिएर सबै गतिविधि हेर्न वा सुन्न पाउनेछन् । त्यस्तै उनीहरुले मतदानसकिएपछि क्षेत्रीय गणनास्थलमा चुनावी सामाग्री पठाउने सबै गतिविधिको अवलोकन गर्न पाउनेछन् ।
कसैलाई मतदानका लागि सहयोग गर्नुपरेमा सहयोग गर्ने व्यक्तिले नाम, ठेगाना, मतदान गर्ने व्यक्तिसँगको सम्बन्ध लगायतका विवरणहरु भर्नुपर्ने नयाँ कानूनमा व्यवस्था गरिएको छ । खासगरी अपांगता भएकाहरुलाई मतदान गर्नका लागि मद्दत गर्ने व्यक्तिले यी सबै विवरणहरु बुझाउनुपर्नेछ । सहयोग गर्ने व्यक्तिले मतदाताका लागि मतपत्र पढ्ने, मतदातालाई मतपत्र पढ्न सघाउने, मतदाताका अनुशार मतपत्रमा चिन्हो लगाउने वा मतदातालाई चिन्हो लगाउन सघाउने लगायतका सिमित सहयोग गर्ने सपथ समेत लिनुपर्नेछ ।
नयाँ कानूनमा उल्लेख गरिएको प्रावधानमा टेक्सासको सेक्रेटरी अफ स्टेटको अफिसले मासिक रुपमा मतदाताको विवरण परीक्षण गर्नुपर्नेछ । ड्राइभर लाइसेन्स वा परिचयपत्र प्राप्त गर्दा वा नविकरण गर्दा कुनै पनि गैर नागरिकको नाम मतदाता नामावलीमा नपरोस् भन्ने सुनिश्चित गर्नका लागि मासिक रुपमा परीक्षण गरिने प्रावधान नयाँ कानूनमा रहेको छ ।