एरिक आडम्सले महामारीमा न्युयोर्क छाडेर फ्लोरिडा गएका ३३ हजारलाई फर्काउन पहल गर्ने
प्रकाशित मिति : भाद्र २०, २०७८ आईतबार
न्युयोर्क सिटीको मेयरका लागि डेमोक्रेटिक उम्मेदबार एरिक आडम्सले महामारीमा न्युयोर्क छाडेर फ्लोरिडा गएका ३३ हजार ५ सयलाई फर्काउन पहल गर्ने बताएका छन् । न्युयोर्कमा महामारी फैलिएपछि उनीहरु ज्यान जोगाउन फ्लोरिडातिर गएका थिए तर पछि फ्लोरिडामा पनि महामारी उच्च बिन्दुमा पुगेको थियो ।
आडम्सले मेयरमा निर्वाचित भइसकेपछि आफ्नो पहिलोमध्येको मिसन कोरोना महामारीमा न्युयोर्क छाडेकालाई फर्काउन पहल गर्ने रहेको बताएका छन् । उनले मेयरका रुपमा पहिलो यात्रा फ्लोरिडाको गर्ने बताएका छन् । जनवरी १ मा सपथग्रहण गरेपछि जनवरी २ मा फ्लोरिडा जाने उनले बताए ।
सन् २०२० मा महामारी सुरु भएपछि सन् २०२१ को जुलाईसम्म न्युयोर्कबाट फ्लोरिडा बसाइसराइ गर्नेहरु ३३ हजार ५ सय रहेको फ्लोरिडाको राजमार्ग सुरक्षा तथा मोटर विभागले जनाएको छ । एरिक आडम्सले न्युयोर्क छाडेर जानेहरुलाई दोष नदिने बताउँदै न्युयोर्क सिटी व्यवसाय गर्नका लागि एकदमै हिंश्रक, कर्मचारीतन्त्रयुक्त र महँगो भएको बताएका छन् ।
वल स्ट्रीट जर्नलका अनुशार सन् २०२० मा न्युयोर्कको मेट्रो क्षेत्रबाट मायामीमात्र बसाइ सर्नेहरुको संख्या २६ हजारभन्दा धेरै रहेको थियो । उनीहरुको गरेको ठेगाना परिवर्तनका आधारमा यो तथ्यांक निकालिएको हो । बसाई सर्नुका पछाडि महामारीमात्र नभएर महँगी, अपराधमा बृद्धि लगायतका कारणहरु समेत रहेको विश्लेषण गरिएको छ । एरिक आडम्सले मेयरमा निर्वाचित भएपछि यी समस्या समाधान गर्ने बताएका छन् ।