बाढीबाट न्युयोर्कका बेसमेन्टमा ३ नेपालीसहित ११ को मृत्युपछि गैरकानूनी बेसमेन्ट हटाउनेबारे बहस
प्रकाशित मिति : भाद्र १९, २०७८ शनिबार
बर्षा र बाढीका कारण न्युयोर्क सिटीमा मृत्यु भएकाहरुमध्ये ११ जना बेसमेन्टमा बस्नेहरु रहेकोमा बेसमेन्टमा गैरकानूनी रुपमा भाडा लगाउनेहरुलाई कारवाही हुनुपर्ने माग उठेको छ । त्यस्तै बेसमेन्टहरु भाडामा लगाउने सन्दर्भमा नियम परिवर्तनको माग समेत सुरु भएको छ ।
अत्यन्तै खराब मौषमको सामना गर्दा फरक तरिका अपनाउनुपर्ने पाठ सिकेको न्युयोर्कका मेयर बिल डे ब्लाजिओले बताएका छन् । खराब मौषमको बेलामा न्युयोर्क सिटीले यात्रा प्रतिबन्धहरु अझ धेरै लागु गनुपर्ने तथा सर्वसाधारणलाई सवबे र सडकबाट बाहिर रहन सुचित गर्नुका साथै जोखिमयुक्त स्थानमा रहेकाहरुलाई खाली गराउनुपर्ने उनले बताए ।
बेसमेन्ट अपार्टमेन्टमा बस्नेहरुलाई अझ धेरे लक्ष्यीत गरेर अलर्टहरु पठाउने तथा घरघरमा पुगेर खाली गराउने् कार्य गर्नुपर्ने मेयरले बताए । न्युयोर्क सिटीमा रहेका ५० हजार बेसमेन्ट अपार्टमेन्टमा बस्ने झण्डै १ लाख व्यक्तिहरुबारे सिटीले डाटाबेस तयार गर्नुपर्ने मेयर ब्लाजिओको भनाई छ । उनीहरुको वास्तविक डाटाबेस तयार गरेपछि आवश्यकता अनुशार हरेक घरघरमा प्रणाली राख्न सकिने मेयरले बताए ।
न्युयोर्क सिटीमा अधिकांश बेसमेन्ट अपार्टमेन्टहरु गैरकानूनी रुपमा संचालित छन् । कम आम्दानी हुनेहरु र कागजपत्रविहिनलाई सस्तो भाडामा घरहरु उपलब्ध गराउनेदेखि न्युयोर्क सिटीले सामुदायिक संघसंस्थाहरुसँग मिलेर काम गर्नुपर्ने मेयर ब्लाजिओको भनाई छ । गैरकानूनी रुपमा रहेका बेसमेन्टमा बस्ने कागजपत्रविहिनहरु घरनिकाला हुनसक्ने वा देशनिकाला हुनसक्ने त्रासले सम्पर्कमा आउन डराउने भएकाले त्यसलाई सही तरिकाले सम्बोधन गर्न आवश्यक रहेको मेयरले बताए ।
न्युयोर्क सिटीको भवन विभागका अनुशार न्युयोर्कमा ११ जनाको मृत्यु भएका ६ वटा बेसमेन्ट अपार्टमेन्टहरुमध्ये ५ वटा अपार्टमेन्टहरु गैरकानूनी रुपमा संचालित रहेका थिए । ती अपार्टमेन्टहरु गैरकानूनी रुपमा बेसमेन्ट कोठा र अपार्टमेन्टमा परिणत गरिएको थियो ।
बाढीबाट क्वीन्सको उडसाइडमा मृत्यु भएका एकैपरिवारका तीनजना नेपालीहरु पनि गैरकानूनी रुपमा रुपान्तरण गरिएको जमिनको स्तरभन्दा तलको अपार्टमेन्टमा बस्दै आएका थिए । त्यस्तै क्वीन्स जमैकामा मृत्यु भएका ४३ बर्षकी महिला र २२ बर्षका पुरुष पनि गैरकानूनी रुपमा रुपान्तरण गरिएको बेसमेन्ट अपार्टमेन्टमा बस्दै आएका थिए । त्यस्तै बु्रकलिनमा मृत्यु भएका ६६ बर्षका पुरुषपनि गैरकानूनी रुपमा रुपान्तरण गरिएको जमिनको स्तरभन्दा तलको कोठामा बसेका थिए ।
सिटी अधिकारीहरुले बेसमेन्टमा बस्दै आएकाहरुलाई घरनिकाला हुने कुनै पनि त्रास विना कुनै समस्या हुँदा ३११ व ९११ मा फोन गर्न सुझाव दिएका छन् । शुक्रबार न्युयोर्क एटोर्नी जनरल लेलिसिया जेम्सले अनियमित बेसमेन्ट अपार्टमेन्टमा बसिरहेकाहरुलाई आपतकालिन आवास भौचरहरु उपलब्ध गराउन आव्हान गरेकी थिइन् ।
यसैबीच मेयरका रिपब्लिकन उम्मेदबार कुर्तिस सिल्वाले आफू मेयरमा निर्वाचित भएमा न्युयोर्क सिटीमा गैरकानूनी रुपमा बेसमेन्ट अपार्टमेन्ट संचालन गर्नेहरुलाई कारवाही गर्ने प्रतिबद्धता जनाएका छन् । उनले बेसमेन्ट अपार्टमेन्टमा बसिरहेका झण्डै एकलाख न्युयोर्कबासीलाई सिटीका व्यापारिक केन्द्रहरुमा खाली रहेका स्थानमा सार्ने प्रतिवद्धता जनाएका छन् ।