Follow @khasokhasmag

जोन्सन एण्ड जोन्सनको बुस्टर डोज लगाउँदा एन्टीबडी स्तरमा ९ गुणा बृद्धि


प्रकाशित मिति : भाद्र ९, २०७८ बुधबार

कोरोनाबिरुद्धको भ्याक्सिन जोन्सन एण्ड जोन्सनको बुस्टर डोज लगाउँदा संक्रमणबिरुद्ध प्रतिरोध प्रणालीको अग्रमोर्चामा रहने एन्टीबडीको स्तरमा अत्यन्तै ठूलो बृद्धि भएको पाइएको छ । कम्पनीले बुधबार जनाए अनुशार जोन्सन एण्ड जोन्सनको पहिलो डोज लगाएको ६ देखि ८ महिनापछि बुस्टर डोज लगाउँदा एन्टीबडी स्तरमा ९ गुणा बृद्धि भएको पाइएको छ ।

पहिलो डोज लगाएको २८ दिनपछि देखिएको एन्टीबडीको स्तरसँग बुस्टर डोज लगाइसकेपछिको एन्टीबडीको स्तर मापन गर्दा उक्त बृद्धि देखिएको हो । उक्त तथ्य अमेरिका र युरोपमा गरिएको दोश्रो चरणको दुई अध्ययनका क्रममा भेटिएको हो । अध्ययनका क्रममा जोन्सन एण्ड जोन्सनको पहिलो डोज लगाएका २ हजारभन्दा धेरै व्यक्ति सहभागी रहेका थिए ।

एकमात्र डोज लगाए पुग्ने जोन्सन एण्ड जोन्सनको भ्याक्सिनको प्रभावकारिता कम्तीमा ८ महिनासम्म रहने पुष्टी भइसकेको कम्पनीले जनाएको छ । एक डोजले नै बलियो प्रतिरोधात्मक प्रतिकृया स्थापित गरेको र बुस्टर डोजले स्थापित गरेको प्रतिरोधात्मक प्रतिकृया आशालाग्दो रहेको कम्पनीको भनाई छ ।

जोन्सन एण्ड जोन्सनको बुस्टर डोज आवश्यक भए नभएकोबारे कम्पनीले अमेरिकन एफडीए, सीडीसी, युरोपियन मेडिसिन एजेन्सी, विश्व स्वास्थ्य संगठन र अन्य स्वास्थ्य प्राधिकरणहरुसँग छलफल गरिरहेको जनाएको छ । अमेरिकामा जोन्सन एण्ड जोन्सनको भ्याक्सिनलाई मोडेर्ना र फाइजरको भ्याक्सिन स्वीकृति भएको झण्डै दुई महिनापछि फरबरीमा स्वीकृति प्रदान गरिएको थियो ।

सीडीसीका अनुशार झण्डै १४ मिलियन अमेरिकनहरुले जोन्सन एण्ड जोन्सनको भ्याक्सिन लगाएका छन् । जोन्सन एण्ड जोन्सनको भ्याक्सिन मोडेर्ना र फाइजर भ्याक्सिनभन्दा फरक तरिकाले बनाइएको भ्याक्सिन हो । मोडेर्ना र फाइजर भ्याक्सिन आरएनए वा एमआरएनएको प्रयोगबाट बनाइएको हो भने जोन्सन एण्ड जोन्सनको भ्याक्सिन रुघाखोकीको भाइरस प्रयोग गरेर भाइरल भेक्टर विधिबाट बनाइएको हो ।

   दर्ता नम्बर: २८२९

नमस्ते मिडिया

© 2022 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com