Follow @khasokhasmag

सोमबार कोरोनाबिरुद्धको फाइजर भ्याक्सिनलाई पूर्ण स्वीकृतिको तयारीमा एफडीए


प्रकाशित मिति : भाद्र ५, २०७८ शनिबार

अमेरिकाको औषधी नियामक एजेन्सी एफडीएले कोरोनाबिरुद्धको फाइजर भ्याक्सिनलाई सोमबार पूर्ण स्वीकृति प्रदान गर्ने तयारी गरेको छ । गत डिसेम्बरमा यो भ्याक्सिनलाई अमेरिकामा आपतकालिन प्रयोगको स्वीकृतिमात्र प्रदान गरिएको थियो ।

नियामकहरुले शुक्रबार नै प्रकृया पूरा गर्ने लक्ष्यका साथ काम गरेपनि पूरा गर्न नसकेको र कागजीपकृया तथा कम्पनीसँगको छलफल जारी रहेकाले सोमबारसम्म यो प्रकृया पूरा हुने अपेक्षा गरिएको छ । केही विषयमा पुनरावलोकनका लागि समय लागेको खण्डमा स्वीकृति सोमबारभन्दा केही ढिलो समेत हुनसक्ने न्युयोर्क टाइम्समा प्रकाशित समाचारमा उल्लेख छ ।

एफडीएले भने यसबारे केही बताएको छैन । एफडीएले यसअगाडि लेबर डेसम्म भ्याक्सिनलाई पूर्ण स्वीकृति प्रदान गर्ने आन्तरिक डेडलाइन तय गरेको थियो । तर उक्त डेडलाइनपनि घोषित डेडलाइन भने होइन । भ्याक्सिनलाई पूर्ण स्वीकृति प्रदान गरेपछि अझैधेरै अमेरिकनहरुले ढुक्क भएर भ्याक्सिन लगाउने अपेक्षा गरिएको छ ।

भ्याक्सिनलाई पूर्ण स्वीकृति प्रदान गरेपछिमात्र केही विश्वविद्यालयहरु र अस्पतालहरुले भ्याक्सिन अनिवार्य गर्ने अपेक्षा गरिएको छ । पेन्टागनले पनि सेप्टेम्बरको मध्यसम्म वा एफडीएले कदम चालेको खण्डमा अझ अगाडि नै भ्याक्सिन अनिवार्य गर्ने योजना बनाएको छ । पूर्ण स्वीकृति प्राप्त भए लगत्तै फाइजरले एफडीएसमक्ष भ्याक्सिनको तेश्रो डोजको स्वीकृतिका लागि आवेदन दिने अपेक्षा गरिएको छ ।

भ्याक्सिनको दोश्रो डोज लगाएको ८ महिना नाघिसकेकाहरुले बुस्टर डोजका लागि तयार रहन र सेप्टेम्बर २० देखि बुस्टर डोज लगाउन सुरु गरिने बाइडेन प्रशासनले बुधबार बताइसकेको छ । फाइजरले तेश्रो डोज सुरक्षित र प्रभावकारी भएको तथ्यांक आगामी साता एफडीएमा बुझाउने अपेक्षा गरिएको छ ।

एफडीएले प्रतिरोध क्षमता कमजोर भएकाहरुलाई फाइजर र मोडेर्नाको तेश्रो डोज गतसाता नै स्वीकृत गरिसकेको छ । यो निर्णयलाई सीडीसीले पनि स्वीकृत गरेपछि कमजोर प्रतिरोधात्मक क्षमता भएकाहरुलाई तेश्रो डोज दिन सुरु गसिकिएको छ ।

नियामकहरुले मोडेर्ना भ्याक्सिनको पूर्ण स्वीकृतिका लागि पनि काम गरिरहेका छन् । तर फाइजरलाई पूर्ण स्वीकृति प्रदान गरेको केहीसातापछिमात्र मोडेर्नाले पूर्ण स्वीकृति पाउने अपेक्षा गरिएको छ । मोडेर्नाले तेश्रो डोजको स्वीकृतिका लागि आगामी सेप्टेम्बरमा आवेदन दिने अपेक्षा गरिएको छ ।

अमेरिकामा अहिलेसम्म २ सय मिलियनभन्दा धेरैले कोरोनाबिरुद्धको भ्याक्सिन लगाइसकेका छन् भने पूर्ण डोज लगाउनेहरु १७० मिलियनभन्दा धेरै रहेका छन् । २०३ मिलियन फाइजरका, १४२ मिलियन मोडेर्नाका र १४ मिलियन जोन्सन एण्ड जोन्सनका डोजहरु अमेरिकामा लगाइसकिएको छ ।

   दर्ता नम्बर: २८२९

नमस्ते मिडिया

© 2022 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com