आजदेखि न्युयोर्क सिटीमा रेष्टुरेण्ट, मनोरञ्जनस्थल र फिटनेशमा जाँदा भ्याक्सिन अनिवार्य
प्रकाशित मिति : भाद्र १, २०७८ मंगलबार
अमेरिकामा लागु भ्याक्सिन पासपोर्ट ।
न्युयोर्क सिटीमा अब रेष्टुरेण्ट लगायतका विभिन्न इन्डोर स्थलहरुमा भ्याक्सिन लगाएको प्रमाण देखाउनुपर्ने नियम आज मंगलबारदेखि लागु भएको छ । कोरोनाको डेल्टा भेरियन्टका कारण संक्रमणदर बढेपछि न्युयोर्क सिटीका मेयर बिल ब्लाजिओले नयाँ नियमको घोषणा गरेका हुन् ।
मनोरञ्जनस्थलहरुमा चलचित्र भवनहरु, संगीत तथा कन्सर्टस्थलहरु, संग्राहायलय र ग्यालरीहरु, अक्वेरियम र चिडियाखानाहरु, खेलकुदस्थलहरु, इन्डोर स्टेडियमहरु, सम्मेलनकेन्द्रहरु, प्रदर्शन हलहरु, कला देखाउने थियटरहरु, पुल र बिलियार्ड हलहरु, बयस्क मनोरञ्जनस्थलहरु लगायतका स्थानमा प्रवेश गर्दा भ्याक्सिन लगाएको प्रमाण देखाउनुपर्नेछ । त्यस्तै रेष्टुरेण्ट, क्याटरिंग हल, होटल बैंकट कक्ष, बार, नाइटक्लब, क्याफेटेरिया, इन्डोर खाना भएका ग्रोसरी स्टोरहरु, कफी शप, इन्डोर खाना भएका फास्ट फुडमा पनि भ्याक्सिन अनिवार्य गरिएको छ ।
त्यस्तै जिम, फिटनेश सेन्टर, फिटनेश क्लास, पौडीस्थल, इन्डोर स्टुडियो र डान्स स्टुडियोभित्र छिर्न पनि भ्याक्सिन अनिवार्य गरिएको छ । १२ बर्षमाथिका ग्राहक र कर्मचारी दुबैले विश्व स्वास्थ्य संगठन वा अमेरिकन एफडीएबाट स्वीकृत कम्तीमा एक डोज भ्याक्सिन लगाएको प्रमाण पेश गर्नुपर्नेछ ।
भ्याक्सिन लगाएको सीडीसी कार्डको फोटो वा सक्कल, न्युयोर्क सिटीको कोभिड सेफ एप, न्युयोर्क राज्यको एक्सेलसियर एप, आधिकारिक भ्याक्सिन रेकर्ड, अमेरिकाबाहिर भ्याक्सिन लगाएको भएमा आधिकारिक रेकर्डको फोटो वा सक्कल देखाएरमात्र यी स्थलहरुमा प्रवेश पाइनेछ । आष्ट्राजेनका (कोभिशिल्ड), साइनोफार्म (भेरोसेल) वा सिनोभ्याकलाई समेत मान्यता दिइएको छ ।
रेष्टुरेष्टभित्र खाना खान, जिमहरु र प्रस्तुतीहरुमा भ्याक्सिन लगाएको प्रमाण पेश गर्नुपर्ने नियम लागु गर्नेमा अमेरिकामा न्युयोर्क सिटी पहिलो भएको छ । यस्तो नियम फ्रान्स र इटलीमा पनि घोषणा गरिएको छ ।
न्युयोर्कका मेयर ब्लाजिओ भ्याक्सिनका सन्दर्भमा आक्रमक रुपमा अगाडि बढेका छन् । उनले न्युयोर्क सिटीका कामदारलाई या त भ्याक्सिन लगाउन या त साप्ताहिक रुपमा कोरोना परीक्षण गर्न नियम लागु गरिसकेका छन् भने भ्याक्सिन लगाउने सर्वसाधारणलाई एकसय डलर दिने नियम लागु गरेका छन् ।