चीनमा छापेर ल्याइएका हजारौं नक्कली भ्याक्सिन कार्ड अमेरिकी अधिकारीको कब्जामा
प्रकाशित मिति : श्रावण ३२, २०७८ सोमबार
अमेरिकन सीडीसीको लोगो सहित चीनमा छापेर अमेरिकामा पठाइएका हजारौं नक्कली भ्याक्सिन कार्डहरु अमेरिकाका संघीय अधिकारीहरुले नियन्त्रणमा लिएका छन् । चीनको शेन्जेनबाट छापेर पठाइएका ती नक्कली भ्याक्सिन कार्डहरु अमेरिकाका विभिन्न स्थानमा पठाउने क्रमममा नियन्त्रणमा लिइएको हो ।
भ्याक्सिन नलगाएका व्यक्तिले नक्कली कार्ड प्रयोग गरेर भ्याक्सिन लगाएको प्रमाण आवश्यक पर्ने स्थानमा जालसाजीका लागि प्रयोग गर्न ती कार्डहरु ल्याइएको सीबीपीले जनाएको छ । भ्याक्सिन लगाएको प्रमाण आवश्यक पर्ने बार, विद्यालयहरु र सार्वजनिक स्थलमा त्यस्ता कार्डहरु प्रयोग गर्ने उद्देश्यले पठाइएको हुनसक्ने आशंका गरिएको छ ।
सीबीपीले ती कार्डहरु मेम्फिसबाट नियन्त्रणमा लिएको हो । कोरोनाबिरुद्धको भ्याक्सिनहरु निशुल्क रहेको र सबैतिर लगाउन सकिने स्मरण गराउँदै सीडीसीले भ्याक्सिन लगाउने चाहना नभए त्यो सम्बन्धित व्यक्तिको स्वविवेक रहेको तर कानूनको उल्ललंघन गर्दै नक्कली कार्डहरु अर्डर गर्न नहुने सीबीपीले वक्तब्यमार्फत जनाएको छ ।
सीबीपीका अधिकारीहरुले ३ हजारभन्दा धेरै नक्कली कार्डले भरिएका १२१ वटा प्याकेटहरु नियन्त्रणमा लिएका थिए । ती प्याकेजहरु सीडीसी वा अन्य मेडिकल एजेन्सीहरुले नपठाएकाले नक्कली भएको सीबीपीले पत्ता लगाएको थियो । कार्डहरुमा स्पेलिङ गल्ती हुनुका साथै शब्दहरुमा गल्ती, स्पानिस अनुवादमा गल्ती रहेको समेत पाइएको छ ।
एफबीआईका अनुशार नक्कली कार्ड बनाउँदा वा किन्दा संघीय कानूनको उल्लंघन हुन्छ । यदि त्यसो गरेमा ५ बर्षसम्म कैदसजाय र जरिवाना समेत हुनसक्छ । सरकारी एजेन्सीको लोगो गलत तरिकाले दुरुपयोग गरेको अभियोगमा त्यस्ता व्यक्तिबिरुद्ध कारवाही हुनसक्ने प्रावधान रहेको छ ।
अनलाइनमा पनि त्यस्ता नक्कली कार्डहरु २५ देखि २ सय डलरसम्ममा बेचेको पाइएको छ । आइतबार प्रहरीले होनोलुलु विमानस्थलमा नक्कली भ्याक्सिन कार्ड प्रयोग गर्ने ५७ बर्षका नोर्भट चुंग र १९ बर्षका ट्रिभोर चुंगलाई पक्राउ गरेको थियो । उनीहरु बाबुछोरा हुन् । उनीहरु क्यालिफोर्नियाबाट हवाई गएका थिए ।
गतमहिना पनि नक्कली भ्याक्सिन कार्ड बोकेर टोरन्टो जान खोज्ने दुईजना व्यक्तिलाई जनही १६ हजार डलर जरिवाना गरिएको थियो ।