Follow @khasokhasmag

अक्टोबरबाट अमेरिकामा सबैका लागि तेश्रो डोजको तयारी, पहिलो प्राथमिकता स्वास्थ्यकर्मीलाई


प्रकाशित मिति : श्रावण ३१, २०७८ आईतबार

ह्वाइटहाउसले अमेरिकामा अक्टोबरबाट कोरोनाबिरुद्धको भ्याक्सिनको तेश्रो डोज प्रदान गर्ने योजनामा काम गरिरहेको न्युयोर्क टाइम्सले जनाएको छ । झण्डै १ सय मिलियन डोज भ्याक्सिन भण्डारणमा रहेकोमा स्वास्थ्यकर्मी र बृद्धाश्रममा बस्नेहरु पहिलो प्राथमिकताका साथ तेश्रो डोज दिइने जनाइएको छ ।

त्यसपछि बढी उमेरका अन्य व्यक्तिलाई पनि तेश्रो डोज दिइने जनाइएको छ । अधिकारीहरुले सुरुमा दुईडोज लिएकै भ्याक्सिनको तेश्रो डोज प्रदान गर्ने योजना बनाएका छन् । अमेरिकामा भ्याक्सिनको मिश्रणका लागि आधिकारिक स्वीकृति प्रदान गरिएको छैन ।

वैज्ञानिकहरु सबैका लागि कोरोनाबिरुद्धको भ्याक्सिनको तेश्रो डोज आवश्यक हुने नहुनेमा अझै पनि बहस गरिरहेका छन् । तर बाइडेन प्रशासनका अधिकारीहरुले लाखौंलाई बुस्टर डोज उपलब्ध गराउने लजिस्टिकका लागि प्रतिक्षा गर्न नसकिने बताएका छन् ।

अक्टोबरबाट तेश्रो डोज दिने तयारी गरेपनि समयतालिका भने तय गरिएको छैन । सुरुका चरणमा तेश्रो डोज गत बर्ष पहिलो डोजका लागि प्राथमिकता दिइएका समुहहरुलाई नै प्रदान गर्ने तयारी भइरहेको छ ।

यसअगाडि सीडीसी र एफडीएले प्रतिरोध क्षमता कमजोर भएकाहरुलाई भ्याक्सिनको तेश्रो डोज स्वीकृत गरिसकेको छ । उनीहरुलाई अब फाइजर वा मोडेर्ना भ्याक्सिनको तेश्रो डोज दिन सकिने भएको छ ।

अमेरिकामा अहिलेसम्म कुल जनसंख्याको ५० दशमलव ७ प्रतिशतले भ्याक्सिनको पूर्ण डोज लगाइसकेका छन् । कम्तीमा एउटामात्र डोज लगाउनेहरुको संख्या २ सय मिलियनको नजिक छ ।

 

   दर्ता नम्बर: २८२९

नमस्ते मिडिया

© 2022 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com