अमेरिकामा निश्चित व्यक्तिका लागि फाइजर वा मोडेर्नाको तेश्रो डोज एफडीएबाट स्वीकृत
प्रकाशित मिति : श्रावण २९, २०७८ शुक्रबार
अमेरिकाको खाद्य तथा औषधि प्रशासन एफडीएले इम्युन प्रणाली कमजोर भएकालाई कोरोनाबिरुद्धको भ्याक्सिनको तेश्रो डोज स्वीकृत गरेको छ । नयाँ अध्ययनले अंग प्रत्यारोपण गरेकाहरुलाई तेश्रो डोजले महत्वपूर्ण फाइदा गरेको निष्कर्ष निकालेपछि एफडीएले तेश्रो डोज स्वीकृत गरेको हो ।
इम्युन प्रणाली कमजोर भएकाहरुले तेश्रो डोज फाइजर वा मोडेर्ना भ्याक्सिन लिनसक्ने एफडीएले जनाएको छ । तर कोरोनाबिरुद्धको भ्याक्सिनको पूर्ण डोज लगाएका र इम्युन प्रणाली सामान्य रहेका व्यक्तिका लागि तेश्रो डोज आवश्यक नभएको एफडीएले स्पष्ट पारेको छ ।
एफडीएको स्वीकृतिपछि अब सीडीसीले यसबारे निर्णय गर्नेछ । त्यसका लागि शुक्रबार सीडीसीको भ्याक्सिन सल्लाहकार समितिको बैठक बोलाइएको छ । सीडीसीले स्वीकृत गरेको खण्डमा तेश्रो डोज तत्काल सुरु गर्न सकिनेछ ।
अंग प्रत्यारोपण गरेकाहरुमा कोरोनाबिरुद्धको मोडेर्ना भ्याक्सिनले प्रभावकारी रुपमा एन्टीबडीको स्तर बढाएको अध्ययनले देखाएको छ । कमजोर इम्युन प्रणाली भएकाहरुमा यो भ्याक्सिनको तेश्रो डोजको परीक्षण गरिएको थियो ।
अंग प्रत्यारोपण गरेकाहरु र इम्युन प्रणाली कमजोर भएकाहरुले भ्याक्सिनको सुरुको मात्राहरु लगाउँदा उल्लेख्य प्रतिरोधात्मक क्षमता उत्पन्न गर्न नसक्ने भएकाले बुस्टर डोज आवश्यक देखिएको हो ।
एफडीएले इम्युन प्रणाली सामान्य भएका अरु व्यक्तिका लागि तेश्रो डोज भ्याक्सिनबारे अध्ययन गरिरहेको छ । नयाँ अध्ययनमा १ सय ५० जना अंग प्रत्यारोपण गरेकाहरुमा दोश्रो डोज लगाएको दुईमहिनापछि तेश्रो डोज मोडेर्ना भ्याक्सिन दिइएको थियो । तेश्रो डोज लगाएको एक महिनापछि उनीहरुमध्ये ५५ प्रतिशतमा उल्लेख्यमात्रामा एन्टीबडी विकाश भएको थियो ।
टोरन्टोको अजमेरा प्रत्यारोपण केन्द्रमा उक्त अध्ययन गरिएको हो । उक्त अध्ययनको निष्कर्ष बुधबार मेडिकल जर्नलमा प्रकाशित गरिएको थियो । अंग प्रत्यारोपण गरेकाहरुमा दोश्रो डोज भ्याक्सिनपछिपनि कोरोना संक्रमणबाट बिरामी हुने अवस्था आएपछि शोधकर्ताहरुले अध्ययन सुरु गरेका थिए ।