डेल्टाभन्दा खतरनाक कोरोना भेरियन्ट आउने सीडीसीका पूर्व निर्देशकको चेतावनी


प्रकाशित मिति : श्रावण २८, २०७८ बिहीबार

अमेरिकाको सीडीसीका पूर्व निर्देशक डाक्टर रोबर्ट रेडफिल्डले कोरोनाको डेल्टा भेरियन्ट भन्दा पनि खतरनाक भेरियन्ट आउने चेतावनी दिएका छन् । डेल्टा भेरियन्टका कारण अमेरिकामा अस्पतालहरुमा बिरामीहरुको संख्या बढिरहँदा रेडफिल्डले आगामी केही महिनामा नै अझ खतरनाक भेरियन्ट आउने चेतावनी दिए ।

कोरोनाको डेल्टा भेरियन्टका कारण अमेरिकामा दैनिक संक्रमितहरु थपिने संख्या डेढलाखभन्दा बढी रहेको छ । दुईदेखि चार महिनाभित्र कोरोनाको डेल्टाभन्दा खतनाक भेरियन्टको सामना गर्नुपर्ने र यो अझ संक्रामक हुने फक्स न्यूजसँगको अन्तरवार्तामा रेडफिल्डले बताए ।

कोरोनाको नयाँ भेरियन्टको आविश्कार रोक्ने एकमात्र उपाय भ्याक्सिन लगाउनु रहेको उनले बताए । भ्याक्सिन नलगाएका व्यक्तिमा कोरोना भाइरसले स्वरुप परिवर्तन गर्न सहज हुने भएकाले नयाँ भेरियन्टको खतरा रहेको वैज्ञानिकहरुले चेतावनी दिदै आएका छन् ।

अमेरिकामा कुल जनसंख्याको ५० दशमलव ३ प्रतिशतले कोरोनाबिरुद्धको भ्याक्सिन पूर्णरुपमा लगाएका छन् । कम्तीमा एकडोज लगाउनेहरु कुल जनसंख्याको झण्डै ६० प्रतिशत रहेका छन् । अहिलेसम्म अमेरिकामा १६७ मिलियनले पूर्णरुपमा भ्याक्सिन लगाएका छन् ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com