अमेरिकामा कोरोना संक्रमण संख्या भ्याक्सिन कार्यक्रम सुरु गरेयताकै उच्च
प्रकाशित मिति : श्रावण २४, २०७८ आईतबार
अमेरिकामा दैनिक औषत कोरोना संक्रमण संख्या कोरोनाबिरुद्धको भ्याक्सिन कार्यक्रम संचालन गरेयताकै उच्च बिन्दुमा पुगेको छ । अहिले अमेरिकामा हरेक दिन कोरोना संक्रमितको संख्या औषतमा १ लाख नाघेको छ ।
जोन हप्किन्स युनिभर्सिटीको तथ्यांक अनुशार यो विगत ६ महिनायताकै उच्च हो । यसअगाडि औषत दैनिक कोरोना संक्रमण १ लाख नाघेको फरबरी ११ मा हो । जुनमा सबैभन्दा कम दैनिक ११ हजार २ सय ९९ संक्रमणका केसहरु रहेका थिए ।
अहिलेदेखिएको संक्रमण अधिकांश भ्याक्सिन नलगाएकाहरुमा रहेको छ । त्यस्तै कोरोनाको डेल्टा भेरियन्टले संक्रमण उच्च बनाएको छ । यो भेरियन्ट निकै संक्रामक रहेकाले यसले विश्वब्यापी चिन्ता बढाएको छ ।
अमेरिकामा कुल जनसंख्याको झण्डै आधालेमात्र पूर्णरुपमा भ्याक्सिन लगाएका छन् । झण्डै आधा जनसंख्याले भ्याक्सिन नलगाउँदा संक्रमण संख्यामात्र होइन, अस्पताल भर्ना हुने संख्या र मृत्यु पनि बढेको छ ।
शुक्रबारको तथ्यांक हेर्दा कोरोना संक्रमणबाट अमेरिकामा अस्पतालमा भर्ना भएर उपचार गराइरहेकाहरुको संख्या ६३ हजार २ सय ५० रहेको छ । यो संख्या गत जुन २९ मा १६ हजार १ सय ५२ रहेको थियो ।
फ्लोरिडामा कोरोना संक्रमणबाट अस्पतालमा भर्ना हुने दर अमेरिकामै सबैभन्दा धेरै रहेको छ । यो राज्यमा कुल जनसंख्याको ४९ दशमलव ५ प्रतिशतले पूर्णरुपमा भ्याक्सिन लगाएका छन् ।