अमेरिकामा झण्डै १० हजार स्टोर भएको सीभीएसबाट जोन्सन एण्ड जोन्सन भ्याक्सिन वितरण बन्द
प्रकाशित मिति : श्रावण २२, २०७८ शुक्रबार
अमेरिकामा झण्डै १० हजार स्टोरहरु रहेको सीभीएस फार्मेसीले जोन्सन एण्ड जोन्सनको भ्याक्सिन वितरण नगर्ने भएको छ । एकडोजमात्र लगाए पुग्ने यो भ्याक्सिनबाहेक अन्य दुई भ्याक्सिनहरु पनि सीभीएसमा उपलब्ध रहेका छन् ।
अब जोन्सन एण्ड जोन्सन भ्याक्सिन लगाउन सीभीएस जानेहरुले या त मोडेर्ना वा फाइजरको भ्याक्सिन रोज्नुपर्नेछ, या त जोन्सन एण्ड जोन्सनको भ्याक्सिन लगाउन अन्य स्थलमा जानुपर्नेछ । सीभीएसले जोन्सन एण्ड जोन्सनको भ्याक्सिन वितरण रोक्नुको कारणबारे भने केही बताएको छैन ।
अझैपनि अमेरिकाको वासिंटन डिसी र २५ राज्यहरुमा रहेका मिनेट क्लीनिकहरुमा भने जोन्सन एण्ड जोन्सन भ्याक्सिन प्राप्त गर्न सकिनेछ । केही कम्पनीहरुका औषधीपसलहरुभित्र त्यस्ता मिनेट क्लीनिकहरु रहेका छन्, जसले आपतकालिनबाहेकका स्वास्थ्य सेवाहरु प्रदान गर्छन् ।
आफूहरु खतरनाक कोरोना महामारीका अन्त्य गर्नका लागि प्रतिबद्ध रहेको र कोरोनाबिरुद्ध संरक्षण प्रदान गर्ने तथा अस्पताल भर्नाहुनबाट एवं मृत्युबाट बचाउने जोन्सन एण्ड जोन्सन भ्याक्सिन कोरोनाबिरुद्ध लड्ने महत्वपूर्ण हतियार रहेको सीभीएसले बताएको छ । जोन्सन एण्ड जोन्सनको भ्याक्सिन गत फरबरीमा अमेरिकामा स्वीकृत हुँदा यसलाई वरदानका रुपमा लिइएको थियो । किनभने यो भ्याक्सिन सामान्य तापक्रममा महिनौं भण्डारण गर्न सकिन्छ ।
अमेरिकामा १ करोड ३४ लाखले कोरोनाबिरुद्धको भ्याक्सिन जोन्सन एण्ड जोन्सन लगाएका छन् । तर सबैभन्दा बढी भने अमेरिकामा फाइजर भ्याक्सिन लगाइएको छ । ८ करोड ८६ लाखले अमेरिकामा पूर्णरुपमा फाइजर भ्याक्सिन लगाएका छन् भने ६ करोड ३७ लाखले पूर्णरुपमा मोडेर्ना भ्याक्सिन लगाएका छन् ।
जोन्सन एण्ड जोन्सन भ्याक्सिन डेल्टा भेरियन्टबिरुद्ध मृत्यु रोक्न ९६ प्रतिशत प्रभावकारी
साउथ अफ्रिकामा गरिएको अध्ययनमा जोन्सन एण्ड जोन्सन भ्याक्सिन डेल्टा भेरियन्टबिरुद्ध अस्पताल भर्ना हुनेगरी सिकिस्त हुने अवस्था रोक्न ७१ प्रतिशत र मृत्यु रोक्न ९६ प्रतिशत प्रभावकारी दिएको छ । ४ लाख ८० हजार स्वास्थ्यकर्मीहरुबीचको परीक्षणमा कोरोनाबिरुद्धको जोन्सन एण्ड जोन्सन भ्याक्सिन डेल्टा भेरियन्टबिरुद्ध उच्च प्रभावकारी देखिएको छ ।
यो भ्याक्सिनको डेल्टा भेरियन्टबिरुद्धको प्रभावकारिताबारे यो स्तरको सबैभन्दा ठूलो अध्ययन पहिलो हो । यो अध्ययनले जोन्सन एण्ड जोन्सन भ्याक्सिनको प्रभावकारिताबारे उठेका कैयन प्रश्नको जवाफ प्राप्त भएको छ । एकडोजमात्र लगाए पुग्ने यो भ्याक्सिनको प्रभावकारिता अहिलेसम्म ८ महिनासम्म कायम रहेको अध्ययनको निष्कर्ष छ ।
यो अध्ययनको परिणामबाट जोन्सन एण्ड जोन्सन भ्याक्सिनको बुस्टर शट आवश्यक नभएको देखिएको अध्ययन परीक्षणको सह नेतृत्व गरेकी ग्लेण्डा ग्रेले बताएकी छिन् । उनी साउथ अफ्रिकन मेडिकल रिसर्च काउन्सिलकी अध्यक्ष समेत हुन् । साउथ अफ्रिकाको भ्याक्सिन कार्यक्रममा जोन्सन एण्ड जोन्सन भ्याक्सिन मुख्य भ्याक्सिन हो ।
गत महिना अमेरिकामा गरिएको एक अध्ययनमा जोन्सन एण्ड जोन्सनले डेल्टा भेरियन्टबिरुद्ध तुलनात्मक रुपमा कम एन्टीबडी उत्पादन गरेको पाइएको थियो । विज्ञहरुबाट पुनरावलोकन नगरिएको उक्त अध्ययनमा एन्टीबडीको मात्रालाईमात्र मापक बनाइएको थियो ।