आइतबारदेखि भिजिटरहरुलाई भ्याक्सिन अनिवार्य, नत्र सशुल्क परीक्षण: ह्वाइटहाउस
प्रकाशित मिति : श्रावण २२, २०७८ शुक्रबार
आइतबारदेखि ह्वाइटहाउसभित्र प्रवेश गर्ने भिजिटरहरुका लागि भ्याक्सिन अनिवार्य गरिएको छ । भ्याक्सिन नलगाएकाहरुले एकैदिनमा नतिजा आउनेगरी परीक्षण गर्नुपर्नेछ र त्यसको रकम तिर्नुपर्नेछ । अमेरिकामा कोरोनाको डेल्टा भेरियन्ट बढ्दै गएपछि ह्वाइटहाउस छिर्ने अतिथिहरुका लागि समेत यस्तो नियम बनाइएको हो ।
पत्रकारहरुलाई पनि यो नियमबाट छुट दिइने छैन । यद्यपी ह्वाइटहाउसबारे समाचार सम्प्रेषण गर्ने पत्रकारहरु प्राय सबैले भ्याक्सिन लगाइसकेका छन् । ह्वाइटहाउस प्रवेश गर्नु अगाडि फर्म भराइनेछ । फर्म भर्दा पूर्णरुपमा भ्याक्सिन लगाएको वा नलगाएकोबारे उल्लेख गर्नुपर्नेछ । जसले भ्याक्सिन लगाएको छैन वा जवाफ दिन अस्वीकार गरेको छ उनीहरुलाई ह्वाइट हाउसले गर्ने कोरोना परीक्षणस्थल तिर पठाइनेछ ।
ह्वाइटहाउसको परिसरमा रहँदा पूरै समय मास्क लगाउनुपर्नेछ । त्यस्तै सामाजिक दुरी कायम गर्नुपर्नेछ भने अतिथिहरुले कोरोना परीक्षणका लागि शुल्क तिर्नुपर्नेछ । संघीय कर्मचारीका सन्दर्भमा पनि सोही नियम लागु हुने जनाइएको छ ।
जुनमा गरिएको सर्वेक्षणमा ह्वाइटहाउसमा खट्ने अधिंकाश पत्रकारले भ्याक्सिन लगाएको पाइएको थियो । जसका कारण ह्वाइटहाउसले पत्रकारलाई दैनिक परीक्षण गर्नुनपर्ने नियम लागु गरेको थियो । तर अब भ्याक्सिन नलगाएका पत्रकारले अब परीक्षण गराउनुपर्नेछ भने शुल्क पनि तिर्नुपर्नेछ ।