न्युयोर्क र क्यालिफोर्नियामा भ्याक्सिन नलगाउने कामदारले साप्ताहिक कोरोना परीक्षण गर्नुपर्ने
प्रकाशित मिति : श्रावण ११, २०७८ सोमबार
अमेरिकाको न्युयोर्क सिटी र क्यालिफोर्नियामा सबै सरकारी कर्मचारीहरुले कोरोनाबिरुद्धको भ्याक्सिन लगाउनुपर्ने वा साप्ताहिक रुपमा कोरोना परीक्षण गर्नुपर्ने नियमको घोषणा गरिएको छ । अमेरिकाको डिपार्टमेन्ट अफ भेट्रान आफ्ना स्वास्थ्य कर्मचारीहरुलाई भ्याक्सिन अनिवार्य गर्ने मुख्य संघीय एजेन्सी बनेको छ ।
अमेरिकामा भ्याक्सिन लगाउनेहरुको प्रतिशत कुल जनसंख्याको ५० प्रतिशत पनि नपुगेपछि भ्याक्सिनबारेका नियमहरु कडा बनाइदै लगिएको छ । अर्कोतर्फ अमेरिकामा कोरोनाको डेल्टा भेरियन्टका कारण संत्रमण दर बढेको छ भने अधिकांश संक्रमितहरुमा डेल्टा भेरियन्ट भेटिएको छ ।
मास्क लगाएरमात्र नहुने र मास्क अनिवार्यको नियम अस्थायी भएकाले अगाडि बढ्नका लागि भ्याक्सिन अनिवार्यको नियम नै उचित बाटो रहेको ब्राउन युनिभर्सिटी स्कुल अफ पब्लिक हेल्थका डाक्टर अनिश झाले बताएका छन् ।
न्युयोर्क सिटीमा मेयर बिल ब्लाजिओले सबै नगरभित्रका स्थानीय सरकारका कर्मचारीहरुले मध्य सेप्टेम्बरसम्म भ्याक्सिन लगाउनुपर्ने वा साप्ताहिक परीक्षण गराउनुपर्ने नियम घोषणा गरेका हुन्, जसमा शिक्षकहरु र प्रहरी अधिकारीहरु समेत रहेका छन् ।
क्यालिफोर्नियाले पनि सबै राज्यका कर्मचारीहरुको अतिरिक्त निजी र सार्वजनिक क्षेत्रका लाखौं स्वास्थ्य कर्मचारीको भ्याक्सिनको प्रमाण वा साप्ताहिक परीक्षणको प्रमाण पेश गर्न अनिवार्य गरिएको छ ।