स्वास्थ्य समस्याका कारण बाइडेनले राजिनामा दिनेछन्: ह्वाइटहाउसका पूर्व डाक्टर
प्रकाशित मिति : श्रावण १०, २०७८ आईतबार
ह्वाइटहाउसका पूर्व डाक्टर तथा विवादित रिपब्लिकन सांसद रोनी ज्याक्सनले अमेरिकी राष्ट्रपति जो बाइडेनले राजिनामा दिने अनुमान गरेका छन् । उनले भने – ‘मलाई विश्वास छ कि बाइडेनले आफ्नो सिमित संज्ञानात्मक क्षमताका कारण राजिनामा दिनेछन् ।’
संज्ञानात्मक परीक्षणमा बाइडेन उत्तिर्ण हुन नसक्ने रोनी ज्याक्सनको भनाई छ । बाइडेनको स्वास्थ्य अवस्था बिग्रदै गएको दावी रिपब्लिकनहरुमाझ फैलिदै गएकोमा ज्याक्सनले पनि यो दावी दोहोराएका छन् ।
बाइडेनको स्वास्थ्यका कारण डेमोक्र्याट्सहरुले नै उनलाई राजिनामाका लागि मनाउने वा २५ औं संसोधन प्रयोग गरेर बाइडेनलाई हटाउने समेत ज्याक्सनको अनुमान छ । ज्याक्सनले बाइडेनको संज्ञानात्मक परीक्षण हुनुपर्ने समेत बताएका छन् ।
बाइडेन राष्ट्रपतिका रुपमा काम गर्न मानसिक रुपमा उपयुक्त रहेको प्रमाणित गर्न संज्ञानात्मक परीक्षण गर्नुपर्ने माग गर्दै दर्जन बढी रिपब्लिकनले हस्ताक्षर गरेको पत्र समेत गत जुनमा सार्वजनिक भएको थियो । रोनी ज्याक्सन पूर्व राष्ट्रपति डोनाल्ड ट्रम्प र बराक ओबामाका ह्वाइटहाउस चिकित्सक रहेका थिए ।
रोनी ज्याक्सन सन् २०१८ मा ट्रम्पको भोजनका सन्दर्भमा गरेको टिप्पणीका कारण पनि विवादमा आएका थिए । उनले ट्रम्पको भोजन एकदमै राम्रो भएको बताएका थिए, जब कि त्यतीबेला ट्रम्पले नियमित रुपमा फास्टफुड खाइरहेका थिए भने व्यायाम समेत गरेका थिएनन् ।
ह्वाइटहाउसका अधिकारीले यसैबर्षको अन्तिमतिर बाइडेनको बार्षिक स्वास्थ्य जाँचको तयारी भइरहेको बताएका थिए । त्यसको नतिजा सार्वजनिक रुपमा नै प्रकाशित गरिने भएको छ ।