काठमाडौंमा साउन ४ देखि जोन्सन एण्ड जोन्सनको खोप वितरण यथावत, केन्द्रहरु बदलिन सक्ने
प्रकाशित मिति : श्रावण ३, २०७८ आईतबार
काठमाडौंमा साउन ४ देखि ६ सम्म जोन्सन एण्ड जोन्सनको भ्याक्सिन वितरण गर्ने तालिका यथावत नै रहेको जिल्ला प्रशासन कार्यालय काठमाडौंले जनाएको छ । अधिकांश भेरोसेलकै खोप वितरण गरिएका खोप केन्द्रहरुबाट जोन्सन एण्ड जोन्सन भ्याक्सिन वितरण गर्ने तयारी भएपनि कतिपय नगरपालिकाहरुका सन्दर्भमा भने खोप केन्द्रहरु परिवर्तन हुनसक्ने जनाइएको छ ।
जिल्ला प्रशासन कार्यालय काठमाडौंकी सहायक प्रमुख जिल्ला अधिकारी कल्पना घिमिरे नेपालका अनुशार भोलि साउन ४ देखि ६ सम्म ५० देखि ५४ बर्षसम्मका व्यक्तिलाई कोरोनाबिरुद्धको जोन्सन एण्ड जोन्सनको खोप वितरण गरिने तालिका परिवर्तन भएको छैन भने खोप वितरण अभियान अरु कारणले प्रभावित भएको छैन । खोपकेन्द्रहरु विस्तार हुने भएकाले स्थानीय जनप्रतिनिधिहरुलाई सम्पर्क गर्न सुझाव दिइएको छ ।
टोखा नगरपालिकामा खोप केन्द्रहरु परिवर्तन हुनसक्ने नगरपालिकाले जानकारी दिएको छ । तर जोन्सन एण्ड जोन्सनको खोप वितरण अभियान भने साउन ४ देखि ६ सम्म यथावत नै रहेको टोखा नगरपालिकाको भनाई छ । त्यस्तै बुढानिलकण्ठ नगरपालिकाका उपप्रमुख रमादेवी राईका अनुशार साउन ४ देखि ६ सम्म जोन्सन एण्ड जोन्सनको खोप वितरण तालिका यथावत नै रहेको छ ।
नेपाल प्रहरी अस्पताल काठमाडौंले भने भोलिदेखि जोन्सन एण्ड जोन्सनको खोप वितरणबारे आफूहरुकहाँ कुनै जानकारी नआइसकेको जानकारी दिएको छ । काठमाडौं महानगरपालिकाले साउन ४ देखि ६ को खोप अभियानबारे कुनै थप सुचना र जानकारी सार्वजनिक गरेको छैन ।
को को योग्य ?
जोन्सन एण्ड जोन्सन भ्याक्सिन ५० देखि ५४ वर्ष उमेरका व्यक्तिले लगाउन सक्नेछन् । तोकिएको उमेर समुह बाहेक जोन्सन एण्ड जोन्सन भ्याक्सिन लगाउन अशक्त र अपाङ्गता भएका व्यक्ति समेत योग्य रहेका छन् । त्यस्तै नेपालमा रहेका शरणार्थी, स्वास्थ्यकर्मी र सरसफाईकर्मीहरूलाई समेत यो भ्याक्सिन पाउन योग्य छन् ।
भ्याक्सिन लगाउनका लागि नागरिकले उमेर खुल्ने आधिकारिक प्रमाण नागरिकता, पासपोर्ट, सवारी चालक प्रमाणपत्र, शैक्षिक प्रमाणपत्र र सो नभएमा पालिका, वडाबाट उमेर प्रमाणित कागजात लिएर जानुपर्नेछ।
जोन्सन एण्ड जोन्सन भ्याक्सिनका ५ मुख्य विशेषता
१, जोन्सन एण्ड जोन्सनको भ्याक्सिन ठीक्कदेखि सिकिस्तसम्मको संक्रमण रोक्न ६६ प्रतिशत प्रभावकारी रहेको छ भने सिकिस्त हुनबाट रोक्न ८५ प्रतिशत प्रभावकारी रहेको छ । जोन्सन एण्ड जोन्सनको एउटा डोज लगाएको २८ दिनपछि कोरोनाको कारण अस्पताल भर्ना हुने र मृत्यु हुनेदर शुन्य रहेको छ । मोडेर्ना र फाइजरको तुलनामा जोन्सन एण्ड जोन्सनका साइड इफेक्ट पनि कम छन् ।
२, जोन्सन एण्ड जोन्सनको भ्याक्सिन २ देखि ८ डिग्री सेल्सियसको तापक्रममा आइपुग्छ र यही तापक्रममा भ्याक्सिनको म्यादसम्मै भण्डारण गर्न सकिन्छ । त्यस्तै प्रयोगका लागि प्वाल पारिएको भ्याक्सिनको शीशी पनि यो तापक्रमममा ६ घण्टासम्म राख्न सकिन्छ । नेपालको स्वास्थ्य संरचनामा यो तापक्रममा भ्याक्सिन राख्न र वितरण गर्नमा समस्या छैन नेपालमा भण्डारणका लागि समेत उचित व्यवस्था रहको छ ।
३, प्राय सबै कोरोनाबिरुद्धका भ्याक्सिन दुई डोज लगाउनुपर्ने भएतापनि जोन्सन एण्ड जोन्सनको भ्याक्सिन एकडोजमात्र लगाए पुग्छ । भ्याक्सिन लगाएको १४ दिनपछि कोरोनाबिरुद्ध संरक्षण प्रदान गर्न सुरु गर्छ भने २८ दिनपछि पूर्ण संरक्षण प्राप्त हुन्छ । यो अमेरिकामा प्रयोगको स्वीकृति पाएको तेश्रो भ्याक्सिन हो भने यो भ्याक्सिन अमेरिकामा झण्डै १२ मिलियनले लगाएका छन् ।
४, यो भ्याक्सिन १८ बर्षभन्दा माथिका व्यक्तिलाई लगाउन अनुमति छ । यद्यपी ५० बर्षभन्दा कम उमेरका महिलालाई यो भ्याक्सिन लगाउँदा भने सावधान हुन चेतावनी दिइएको छ । भ्याक्सिन लगाएपछि कम प्लेटलेस र रगत जम्नसक्ने दुर्लभ जोखिमका कारण ५० बर्षभन्दा कम उमेरका महिलाले यो भ्याक्सिन लगाउँदा विचार गर्न भनिएको छ । भ्याक्सिन कोरोना संक्रमणबिरुद्ध सुरक्षित र प्रभावकारी रहेको तथा जोखिमको तुलनामा फाइदा धेरै भएकाले जोखिमलाई फाइदाले जितेको अमेरिकाको एफडीए र सीडीसीको निष्कर्ष छ ।
५, जोन्सन एण्ड जोन्सनको भ्याक्सिनले डेल्टा भेरियन्टबिरुद्ध बलियो संरक्षण प्रदान गर्ने अध्ययनले देखाएको छ । नेपालमा डेल्टा भेरियन्टको प्रभाव रहेको अवस्थामा यो भ्याक्सिन नेपालका लागि बढी उपयोगी सावित हुनेछ ।
भेरोसेल लगाउन गएका घण्टौं लाइनमा बसेर फर्किए
असार २९ देखि साउन २ सम्म काठमाडौं उपत्यकामा चाइनिज खोप भेरोसेल वितरण गरिएको थियो । कतिपय नगरपालिकाहरुले असार ३० देखि खोप अभियान संचालन गरेका थिए । तर साउन २ मा खोपको अभाव भएको भन्दै कतिपय खोपकेन्द्रमा घण्टौं लाइनमा बसेकाहरुलाई खोप नलागाई फिर्ता पठाइएको थियो ।
काठमाडौं महानगरपालिकाले साउन १ मा सुचना निकालेर प्रयाप्त खोप उपलब्ध नभएको भन्दै खोप कार्यक्रम स्थगित गरेको जनाएको थियो । सुचनाको अभावमा साउन २ मा खोप लगाउन केन्द्रहरुमा गएका कैयन व्यक्ति खोप नलगाई निराश भएर फर्कनुपरेको थियो । त्यस्तै टोखा नगरपालिकामा पनि यस्तै समस्या आएको थियो । खोपको अभाव भएको भन्दै साउन २ को खोप कार्यक्रम स्थगित गरिएकोमा सुचनाको अभावमा कैयनले दुख पाएका थिए ।
काठमाडौंबाहेक अन्य जिल्लामा पनि घण्टौं लाइनमा बसेर खोप नपाएर फर्कनुपरेको कैयनको गुनासो रहेको छ । खोप वितरणमा अव्यवस्थीत लाइन, पहुचमा आधारमा खोपको वितरण, लाइनमा बसेकाहरुलाई खोप नलगाई फिर्ता जस्ता समस्या देखिएका छन् ।
अहिलेसम्म तय भएका भ्याक्सिन वितरण केन्द्र
भ्याक्सिन वितरण केन्द्रहरुमा फेरबदल हुनसक्ने भएकाले आआफ्नो पालिका, खोपकेन्द्र वा स्थानीय निकायमा बुझेरमात्र खोप लगाउन जानुहोला ।
काठमाडौं महानगरपालिकाभित्र खोपकेन्द्र :
गोकर्णेश्वर, टोखा, नागार्जुन, चन्द्रागिरी, शंखरापुर र दक्षिकालीका खोप केन्द्रहरु
कागेश्वरी मनोहरा र तारकेश्वरका खोप केन्द्रहरु
कीर्तिपुर र बुढानिलकण्ठका खोप केन्द्रहरु