कोरोनाबिरुद्धको भ्याक्सिनमा सफलतापछि मोडेर्नाको निशानामा एचआईभी, क्यान्सर, जीका र फ्लु
प्रकाशित मिति : असार ३१, २०७८ बिहीबार
कोरोनाबिरुद्ध एमआरएनए विधिबाट बनाइएको भ्याक्सिनमा सफलतापछि मोडेर्नाको निशानामा अब एचआईभी, क्यान्सर, जीका र फ्लु समेत परेका छन् । भ्याक्सिन निर्माणको परम्परागत विधिलाई चुनौती दिदै एमआरएनए विधिबाट बनेको भ्याक्सिन सबैभन्दा धेरै सफल भएपछि यही विधिबाट एचआईभी, क्यान्सर, जीका र फ्लुबिरुद्ध लड्ने भ्याक्सिन निर्माणको योजनामा मोडेर्ना लागेको हो ।
गतबर्षसम्म एमआरएनए विधिबाट बनाइएको भ्याक्सिन तेश्रो चरणको क्लीनिकल परीक्षणसम्म पुग्नेमा नै विज्ञहरुले आंशका गरेका थिए । तर परम्परागत विधिबाट बनेका कोरोनाबिरुद्धको भ्याक्सिनको तुलनामा एमआरएनए विधि बढी प्रभावकारी र कोरोनाबिरुद्धको लडाईमा बरदान नै सावित भएपछि एमआरएनए विधि अन्य रोगहरुबिरुद्ध समेत प्रयोग गर्न सकिनेबारे अध्ययन सुरु भएको छ ।
गतबर्षसम्म घाटामा रहेको मोडेर्ना इन्कले यो बर्ष १ बिलियन डोजसम्म भ्याक्सिन डेलिभर गर्ने र १९ बिलियन डलरसम्म आम्दानी गर्ने अपेक्षा गरिएको छ । पहिलोपटक कम्पनीको बजार मूल्य जुलाई १४ मा एकसय बिलियन डलर नाघेको छ । कम्पनीका सीईओ स्टेफन बन्सेलले कोरोनाबिरुद्धको भ्याक्सिन सुरुवातमात्र भएको र एमआरएनए विधिले काम गरेमा कम्पनीले मुटुको रोगदेखि क्यान्सरसम्मका रोगहरुबिरुद्ध नेतृत्व गर्न सक्षम हुने बताएका छन् ।
मोडेर्नाले अहिले मुटुको रोगदेखि क्यान्सरहुँदै दुर्लभ जेनेटिक अवस्थासम्मका लागि औषधीको परीक्षण गरिरहेको छ । सीईओ बन्सेलले उनको कम्पनी जिका, निम्फ, एचआईभी जस्ता भाइरसहरुबिरुद्ध भ्याक्सिन विकाश गरेर प्रभावकारी भ्याक्सिन उत्पादक बन्न सक्ने समेत बताएका छन् । विगत ४० बर्षमा ५० भन्दा धेरै मान्छेमा संक्रमण हुने नयाँ भाइरसहरु भेटिएका छन् । त्यसका बिरुद्ध जम्मा ३ वटा भ्याक्सिनमात्र स्वीकृतिप्राप्त रहेका छन् ।
मोडेर्ना कम्पनीले १० प्रकारका भाइरबिरुद्धका भ्याक्सिनमा काम गरिरहेको छ । जसमध्ये केहीको मान्छेमा क्लीनिकल परीक्षण भइसकेको छ भने केहीको हुने चरणमा रहेको छ । जसमा तीनप्रकारका कोभिड १९ बिरुद्धका बुस्टर भ्याक्सिन समेत रहेका छन् । ती परीक्षणको मध्य चरणमा रहेका छन् । फ्लुबिरुद्धको भ्याक्सिनको मान्छेमा परीक्षण यसै महिनाबाट सुरु हुनेछ । एचआईभीबिरुद्धको भ्याक्सिनको अध्ययन यसैबर्षको अन्तिमदेखि सुरु हुनेछ ।