अमेरिकाको ओहायोमा दुर्घटनावश एउटालाई प्रत्यारोपण गर्नुपर्ने मृगौला अर्कैलाई


प्रकाशित मिति : असार ३१, २०७८ बिहीबार

अमेरिकाको ओहायोमा दुर्घटनावश एउटालाई प्रत्यारोपण गर्नुपर्ने मृगौला अर्कैलाई प्रत्यारोपण गरिएको अस्पतालले स्वीकार गरेको छ । युनिभर्सिटी अस्पताल क्लीभल्याण्ड मेडिकल सेन्टरले यस्तो दुर्घटना भएको स्वीकार गरेको हो ।

अहिले घटनाबारे अनुसन्धान भइरहेको र दुईजना केयरगिभरहरुलाई छुट्टीमा पठाइएको अस्पतालले जनाएको छ । एउटा व्यक्तिलाई दिनुपर्ने मृगौला अर्कै व्यक्तिले पाएको गल्तीबाट आफूहरु निराश भएको अस्पतालले वक्तब्यमार्फत जनाएको छ ।

गल्तीले मृगौला पाउने व्यक्ति पनि प्रत्यारोपण प्रतिक्षा गरिरहेका व्यक्ति रहेका थिए । ती व्यक्तिका लागि पनि गल्तीले प्रत्यारोपण गरिएको मृगौला मिल्दोखालको रहेको र उनी आशा गरे अनुशार नै निको हुँदै गइरहेको अस्पतालले बताएको छ ।

तर जसले मृगौला पाउनुपर्ने थियो, ती व्यक्ति भने अझै पनि मृगौलाको प्रतिक्षामा रहेका छन् । अस्पतालको गल्तीका कारण उनको प्रत्यारोपण सर्जरीमा ढिलाई हुन पुगेको जनाइएको छ ।

अस्पतालले अवस्थाको गम्भीरतापूर्वक पुनरावलोकन गरिरहेको र अमेरिकाको राष्ट्रिय अंग प्रत्यारोपण प्रणाली युनाइटेड नेटवर्क फर अर्गान शेयरिङलाई यसबारे जानकारी दिइसकिएको जनाएको छ । अस्पतालले गल्तीका लागि मृगौला प्रत्यारोपण कुरिरहेका बिरामीका आफन्तहरुसँग माफी समेत मागेको छ ।

मृगौलाको नमुना

यस्ता गल्तीहरु दुर्लभ हुने गरेपनि विगतमा समेत भएको जनाइएको छ । सन् २०१९ मा न्युजर्सीको अस्पतालमा समेत मृगौला प्रत्यारोपण कुरिरहेका दुई बिरामीहरुमध्ये एउटालाई दिनुपर्ने मृगौला अर्कैलाई दिइएको थियो । त्यतीबेला ती दुई बिरामीको नाम र उमेर एउटै भएका कारण उक्त दुर्घटना भएको थियो ।

संयोगवश त्यतीबेला पनि झुक्किएर मृगौला प्रत्यारोपण गरिएका व्यक्तिमा पनि प्रत्यारोपण गरिएको मृगौला मिलेको थियो । यदि मृगौला नमिलेको खण्डमा त्यसको परिणाम निकै नकारात्मक हुनसक्ने र व्यक्तिको मृत्युसमेत हुनसक्ने खतरा रहन्छ ।

सन् २०२० मा अमेरिकाभर झण्डै ३९ हजार अंग प्रत्यारोपण गरिएको छ । त्यसमध्ये अधिकांश मृगौला प्रत्यारोपण रहेका छन् । झण्डै १ लाख ७ अमेरिकनहरु अंग प्रत्यारोपणका लागि प्रतिक्षा सुचीमा रहेका छन् ।

अमेरिकामा विश्वमै सबैभन्दा ठूलो अंगदान र प्रत्यारोपण प्रणाली रहेको छ । महामारीका बेलामा पनि अमेरिकाको संघीय सरकारसँगको सम्झौतामा संचालित गैरनाफामुलक निजी संस्था राष्ट्रिय अंग प्रत्यारोपण प्रणाली युनाइटेड नेटवर्क फर अर्गान शेयरिङले अंग प्रत्यारोपणको व्यवस्था गरेको थियो ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com