जोन्सन एण्ड जोन्सनको भ्याक्सिन वितरणबारे अन्यौल हट्यो, काठमाडौंमा साउन ४ देखि ६ सम्म
काठमाडौंमा जोन्सन एण्ड जोन्सनको भ्याक्सिन वितरणका सन्दर्भमा रहेको अन्यौल हटेको छ । हिजो बसेको बैठकले साउन ४ देखि ६ सम्म काठमाडौंका विभिन्न खोप केन्द्रहरुबाट जोन्सन एण्ड जोन्सन भ्याक्सिन वितरण गर्ने निर्णय गरिएको जिल्ला प्रशासन कार्यालय काठमाडौंकी सहायक प्रमुख जिल्ला अधिकारी कल्पना घिमिरे नेपालले जानकारी दिएकी छिन् ।
यसअगाडि स्वास्थ्य मन्त्रालयको हेल्थ इमर्जेन्सी अपरेशन सेन्टर एचईओसीका अधिकारीहरुले हिजोदेखि नै जोन्सन एण्ड जोन्सनको भ्याक्सिन वितरण सुरु भइसकेको बताएपछि अन्यौल श्रृजना भएको थियो । ती अधिकारीले काठमाडौंका केही अस्पतालबाट जोन्सन एण्ड जोन्सनको भ्याक्सिन वितरण सुरु भइसकेको र बाँकीमा छिट्टै गरिने जानकारी दिएका थिए ।
जिल्ला प्रशासन कार्यालय काठमाडौंकी सहायक प्रमुख जिल्ला अधिकारी नेपालले भनिन् – ‘सोमबार नै यसबारे निर्णय गर्न भनिएको थियो । तर सोमबार सबै जुट्न नसक्दा मंगलबारमात्र बैठक बस्न सम्भव भयो । मंगलबार बसेको बैठकले साउन ४ देखि ६ सम्म काठमाडौंमा जोन्सन एण्ड जोन्सनको भ्याक्सिन वितरण गर्ने निर्णय गरेपनि अब यो अन्यौल हटेको छ ।’
अहिले काठमाडौं महानगरपालिकामा १८ वटा केन्द्रबाट खोप वितरण संचालन गर्ने निर्णय गरिएको तर खोप लगाउनेको चाप बृद्धि भएमा त्यसलाई विस्तार गरेर २५ सम्म बनाउनेबारे काम भइरहेको उनले बताइन् । खोप केन्द्र बिस्तार गरिएको खण्डमा त्यसको जानकारी सार्वजनिक रुपमा नै उपलब्ध गराउने नेपालले जानकारी दिइन् ।
मंगलबारदेखि काठमाडौंमा भेरोसेल खोप वितरण भने सुरु भइसकेको छ । कतिपय नगरपालिकाले बुधबारदेखि भेरोसेल खोप वितरण सुरु गरेका छन् । असार २९ देखि साउन २ सम्म भेरोसेल खोप वितरण हुने र एकदिन खाली राखेर साउन ४ बाट ती केन्द्रहरुबाट नै जोन्सन एण्ड जोन्सनको खोप वितरण हुने भएको छ ।
काठमाडौं महानगरपालिकाभित्र खोपकेन्द्र :
गोकर्णेश्वर, टोखा, नागार्जुन, चन्द्रागिरी, शंखरापुर र दक्षिकालीका खोप केन्द्रहरु
कागेश्वरी मनोहरा र तारकेश्वरका खोप केन्द्रहरु
कीर्तिपुर र बुढानिलकण्ठका खोप केन्द्रहरु
जोन्सन एण्ड जोन्सन भ्याक्सिन ५० देखि ५४ वर्ष उमेरका व्यक्तिले लगाउन सक्नेछन् । तोकिएको उमेर समुह बाहेक जोन्सन एण्ड जोन्सन भ्याक्सिन लगाउन अशक्त र अपाङ्गता भएका व्यक्ति समेत योग्य रहेका छन् । त्यस्तै नेपालमा रहेका शरणार्थी, स्वास्थ्यकर्मी र सरसफाईकर्मीहरूलाई समेत यो भ्याक्सिन पाउन योग्य छन् ।
भ्याक्सिन लगाउनका लागि नागरिकले उमेर खुल्ने आधिकारिक प्रमाण नागरिकता, पासपोर्ट, सवारी चालक प्रमाणपत्र, शैक्षिक प्रमाणपत्र र सो नभएमा पालिका, वडाबाट उमेर प्रमाणित कागजात लिएर जानुपर्नेछ।
५५ बर्षभन्दा माथिकाहरु भने चाइनिज भ्याक्सिन भेरोसेल लगाउन योग्य छन् । विश्वविद्यालय, विद्यालयका प्राध्यापक, शिक्षक र कर्मचारीहरु, सार्वजनिक यातायातमा कार्यरत चालक र सहचालक पनि भेरोसेल लगाउन योग्य रहेका छन् । नेपाल सरकारले तोकेका अत्यावश्यक सेवामा संलग्न खोप लगाउन बाँकी व्यक्तिहरु, खोप अनिवार्य गरेका देशमा जाने नेपाली नागरिकलाई पनि भेरोसेल लगाउन योग्य रहेका छन् ।