न्युयोर्क मेयर चुनावको सच्याइएको नतिजा सार्वजनिक, नेपालीमाझ लोकप्रिय एरिक आडम्सलाई ५१.१ प्रतिशत
प्रकाशित मिति : असार १७, २०७८ बिहीबार
अन्तत: न्युयोर्कको इलेक्सन बोर्डले न्युयोर्क सिटी मेयरका लागि भएको डेमोक्रेटिक प्राइमरी चुनावको सच्याइएको नतिजा सार्वजनिक गरेको छ । नमूना मतपत्रहरु मिसिएको चुनावी मतगणनाको परिणाम सार्वजनिक गरेको भोलिपल्ट प्रणालीबाट नमूना मतपत्रहरुको विवरण हटाएर र्यांक च्वाइस मतगणनाको परिणाम सार्वजनिक गरिएको हो ।
अपडेट गरिएको मतपरिणाम अन्तरगत एरिक आडम्सले २ प्रतिशतलेमात्र अग्रता कायम गरेका छन् । चुनावी रातको परिणाममा आडम्सले झण्डै ९ प्रतिशतले अग्रता कायम गरेका थिए । तर कसैले पनि ५० प्रतिशतभन्दा बढी ल्याउन नसकेपछि र्यांक च्वाइस मत समेत गणना गर्दा एरिक आडम्सको अग्रता अन्तर घटेको हो ।
पूर्व ब्रुकलिन बोरो प्रेसिडेण्ड समेत रहेका आडम्सले कोरोना महामारीमा न्युयोर्कको नेपाली समुदायलाई उल्लेख्य सहयोग समेत गरेका थिए । साथै कोरोना महामारीमा अग्रपंक्तिमा रहेर योगदान दिने नेपाली समुदायका विभिन्न व्यक्तित्वहरुलाई सम्मान समेत गरेका थिए । नेपाली समुदायले आयोजना गर्ने विभिन्न कार्यक्रममा सहभागी हुदै आएका आडम्स न्युयोर्कको नेपाली समुदायको पहिलो छनौट रहेका थिए ।
अहिलेसम्म अग्रिम मतदान र प्राइमरीको दिनमा भएको मतदानको मतपरिणाममात्र सार्वजनिक गरिएको छ । हुलाकबाट पठाएका मतपत्रहरु गणना गर्न भने अझै बाँकी नै छ । अहिलेसम्मको मतपरिणाम अन्तरगत एरिक आडम्सले ३ लाख ५८ हजार ५ सय २१ अर्थात् ५१ दशमलव १ प्रतिशत मत ल्याएका छन् । त्यस्तै क्याथरिन ग्रासियाले ४८ दशमलव ९ प्रतिशत अर्थात् ३ लाख ४३ हजार ७ सय ६६ मत ल्याएकी छिन् ।
नवौं राउण्डसम्मको र्यांक च्वाइस मत गणना गर्दा माया विले चुनावी दौडबाट बाहिरिएकी छिन् । तर उनले अझै १० औं हजार मतगणना गर्न बाँकी रहेकाले चुनाव अझै खुल्ला नै रहेको बताएकी छिन् । चुनावमा १ लाख १७ हजार ३ सय २७ जनाले दोश्रो च्वाइस विना नै एकजनालाईमात्र मतदान गरेका थिए ।
झण्डै १ लाख २३ हजार हुलाकबाट पठाएका मतपत्रहरु गणना गर्न बाँकी रहको छ । एरिक आडम्सले कुल मतमा अग्रता प्राप्त गरेपनि म्यानहटनमा पछाडि छन् । म्यानहटनमा अझै झण्डै ३९ हजार मतपत्रहरु गणना गर्न बाँकी रहेको छ ।
जुन २९ हुलाकबाट मतपत्रहरु प्राप्त गर्ने अन्मित दिन हो । जुलाई ६ मा दोश्रो चरणको र्यांक च्वाइस मतगणनाको रिपोर्ट सार्वजनिक गरिनेछ । औपचारिक रुपमा अन्तिम परिणाम जुलाई ९ मा सार्वजनिक हुने अपेक्षा गरिएको छ ।
रिपब्लिकन प्राइमरीमा भने कुर्तिस सिल्वाले ६८ दशमलव ९ प्रतिशत मत ल्याएर विजय हासिल गरिसकेका छन् । उनले कुल ३६ हजार ८ सय ७२ मत ल्याएका हुन् । कुर्तिस सिल्वाले अब नोभेम्बरमा हुने चुनावमा डेमोक्रेटिक प्राइमरीबाट निर्वाचित हुने उम्मेदबारसँग प्रतिस्पर्धा गर्नेछन् ।
यद्यपी डेमोक्रेटिक प्राइमरीबा निर्वाचित हुने उम्मेदबार नै न्युयोर्कको मेयर हुने पक्का भएकाले नोभेम्बरको चुनावको तुलनामा अहिलेको प्राइमरीलाई चासोका साथ हेरिएको छ ।