कागजपत्रविहिन पनि निशुल्क स्वास्थ्य विमाका लागि योग्य हुने बिल पारित
प्रकाशित मिति : असार १३, २०७८ आईतबार
अमेरिकाको ओरेगनमा कागजपत्रविहिन पनि निशुल्क स्वास्थ्यविमाका लागि योग्य हुने बिल पारित भएको छ । ओरेगन राज्यको सिनेटले शनिबार उक्त बिल पारित गरेको हो । जसमा गभर्नरले हस्ताक्षर गरेपछि राज्यभर रहेका कागजपत्रविहिन आप्रवासीहरु निशुल्क स्वास्थ्य विमा मेडिकेडका लागि योग्य हुने भएका छन् ।
एचबी ३३५ नामको यो बिलको पक्षमा सिनेटमा १७ र विपक्षमा ११ मत खसेको थियो भने राज्यको प्रतिनिधिसभामा पक्षमा ३७ र विपक्षमा २१ मत खसेको थियो । ओरेगनमा झण्डै १ लाख १० कागजपत्रविहिनहरु रहेको र यसबापत आगामी २ बर्षमा राज्यबाट १ सय मिलियन डलर खर्च हुने जनाइएको छ ।
बिल लागु भएपछि एकलाख भन्दा बढीको मेडिकल कभरेज विस्तार हुने अपेक्षा गरिएको छ । उनीहरु अहिलेसम्म आप्रवासी अवस्थाका कारण मेडिकेडका लागि योग्य थिएनन् । गभर्नर केट ब्राउनले बिलमा हस्ताक्षर गर्ने निश्चितप्राय रहेको छ । ब्राउन यो बिलमा पक्षमा रहदै आएका थिए ।
न्युयोर्कले पनि हालैमात्र महामारीका लागि आम्दानी गुमाएका तर संघीय सहायताका लागि योग्य नभएका कागजपत्रविहिनले १५ हजार ६ सय डलरसम्म पाउने गरी २ बिलियनको फण्ड स्थापना गरेको हो । कागजपत्रविहिनहरुलाई पनि विभिन्न सुविधाबाट वञ्चित हुन नदिन डेमोक्र्याट्स राज्यहरुमा चालिएका कदममा ओरेगनको पछिल्लो कदम आएको हो ।