न्युयोर्क सिटी मेयर प्राइमरीको नतिजा आउन सुरु, एरिक आडम्स अगाडि
प्रकाशित मिति : असार ८, २०७८ मंगलबार
न्युयोर्क सिटीमा मेयर, सिटी काउन्सिल सदस्यहरु लगायतका पदका लागि प्राइमरी चुनाव सम्पन्न भएको छ । आजको प्राइमरीमा राती ९ बजेसम्म गरिएको मतदानमा न्युयोर्क सिटीका बासिन्दाले नयाँ मेयरको छनौट गरेका छन् ।
डेमोक्रेटिक प्राइमरीबाट छानिने मेयरले नोभेम्बरमा हुने निर्वाचन जित्ने लगभग पक्का हुने भएकाले आजको प्राइमरी चुनावले न्युयोर्क सिटीको आगामी मेयर लगभग सुनिश्चित गर्छ । त्यसैले न्युयोर्क सिटीबासीहरु चुनावको नतिजाको व्यग्र प्रतिक्षामा रहेका छन् ।
यसैबीच प्राइमरी चुनावको नतिजा आउन सुरु भएको छ । झण्डै साढे ७ प्रतिशत मतगणना हुँदा मेयर उम्मेदबार एरिक आडम्सले ५९ हजार ८ सय २३ मत प्राप्त गरेका छन् भने क्याथरिन ग्रासियाले ४९ हजार ५ सय ९९ मत प्राप्त गरेकी छिन् । त्यस्तै माया विलेले ४४ हजार १०९, एन्ड्रयु यांगले २२ हजार ८१, स्कट स्ट्रीन्जरले १२ हजार १ सय १९ र रेमण्ड म्याक्ग्वीरले ५ हजार ६ सय २२ मत ल्याएका छन् ।
ब्रोंक्सको झण्डै ३५ प्रतिशत मतगणना हुँदा त्यहाँ एरिक आडम्स अगाडि देखिएका छन् । उनले त्यहाँ झण्डै ४५ प्रतिशत मत प्राप्त गरेका छन् । म्यानहटनको ८ प्रतिशत मत गणना हुँदा त्यहाँ ग्रासिया अगाडि देखिएकी छिन् । उनले त्यहाँ ३८ दशमलव ५ प्रतिशत मत ल्याएकी छिन् । म्यानहटनमा एरिक आडम्स तेश्रोमा छन् ।
तर आजको प्राइमरीको अन्तिम नतिजा आउन भने कैयन दिन लाग्ने भएको छ । सिटी बोर्ड अफ इलेक्सनले प्रारम्भिक नतिजा एकसातापछि अर्थात् जुन २९ मा सार्वजनिक गर्ने योजना बनाएको छ । त्यसपछि हुलाकबाट पठाइएका मतपत्रहरु गणना गरेर आधिकारिक नतिजा जुलाई ६ भन्दा अगाडि सार्वजनिक गरिने छैन ।
यसपटक प्राइमरीमा मच्वाइस भोटिङ विधि रहेकाले प्राइमरीमा विजयी हुनेले ५० प्रतिशतमत प्राप्त गर्नुपर्छ । न्युयोर्क सिटीले मेयर, पब्लिक एड्भोकेट, कम्पट्रोलर, बोरो प्रेसिडेण्ट र सिटी काउन्सिलका लागि सबै प्राइमरी र विशेष निर्वाचनमा र्याङक च्वाइस भोटिङ विधि अपनाएको छ । यो विधिबाट मतदान गर्दा न्युयोर्करहरुले पहिले भन्दा धेरै च्वाइसहरु प्राप्त गर्छन् ।
कुनै पनि पदका लागि एउटामात्र उम्मेदबारलाई भोट हाल्नुको साटो मतदाताहरुले ५ जनासम्म उम्मेदबारलाई रोजाईका आधारमा मतदान गर्न पाउने व्यवस्था थियो । पहिलो, दोश्रो, तेश्रो , चौथो र पाँचौं रोजाइसम्मका उम्मेदबारलाई मतदान गर्न पाउने व्यवस्था थियो । पहिलो कोलममा पहिलो रोजाईका उम्मेदबारलाई, दोश्रो कोलममा दोश्रो रोजाईका उम्मेदबारलाई भोट हाल्न सकिने व्यवस्था थियो । यसैगरी तेश्रो, चौथो र पाँचौं रोजाईका उम्मेदबारलाई भोट हाल्न सकिन्छ । एउटामात्र उम्मेदबारलाई भोट हाल्न चाहनेहरुले एउटैलाईमात्र पनि भोट हाल्न सकिने व्यवस्था थियो ।
यसरी मतदानपछि ५० प्रतिशतभन्दा बढी भोट ल्याउने उम्मेदबारले चुनाव जित्नेछ । यदि कसैले पनि ५० प्रतिशतभन्दा बढी भोट नल्याएमा मतगणना दोश्रो चरणमा जानेछ । यो चरणमा सबैभन्दा कम मत ल्याउने उम्मेदबारलाई हटाइनेछ । यदि कुनै पनि मतदाताको पहिलो रोजाईको उम्मेदबार बाहिरिएको खण्डमा उक्त भोट दोश्रो रोजाईको उम्मेदबारमा जोडिनेछ । यसरी नै विजेता प्राप्त नहुँदासम्म कम भोट ल्याउनेलाई हटाउँदै मतगणना जारी राखिनेछ । जब कुनै उम्मेदबारले ५० प्रतिशतभन्दा बढी ल्याउनेछ, उसलाई विजेता घोषणा गरिनेछ ।