आँधीसँगै बर्षा र बाढीले अमेरिकाको अलाबामामा १० बालबालिकासहित १२ को मृत्यु
प्रकाशित मिति : असार ६, २०७८ आईतबार
बर्षा र बाढीसँगै आएको आँधीले अमेरिकाको अलाबामामा १० बालबालिकासहित १२ को मृत्यु भएको छ । दक्षिणपूर्वी अमेरिकामा फैलिएको आँधीका कारण कैयन स्थानमा बाढी आएको छ भने दजनौं घरहरु क्षतिग्रस्त भएका छन् ।
शनिबार मोन्टगोमेरीदेखि ३५ माइल दक्षिणमा रहेको इन्टरस्टेट ६५ मा १५ वटा गाडीहरु दुर्घटना हुँदा ९ जना बालिबालिकाहरु सहित १० जनाको मृत्यु भएको थियो । भिजेको बाटोमा भएको गाडी दुर्घटनामा ४ देखि १७ बर्षसम्मका ८ जनाको मृत्यु भएको थियो ।
त्यस्तै २९ बर्षका कोडी फक्स र ९ महिनाकै एरियाना फक्सको अर्को दुर्घटनामा मृत्यु भएको हो । २४ बर्षका अर्का व्यक्ति र ३ बर्षका बालकको रुख ढलेर च्याप्दा मृत्यु भएको जनाइएको छ । घटनाहरुमा कैयन व्यक्ति घाइते समेत भएको जनाइएको छ ।
शनिबार राती अबेर उत्तरी अलाबामा र जर्जियामा अकस्मात भारी बर्षा भएको थियो । मिसिसिपी गल्फ कोस्ट लगायतका स्थानमा १२ इन्चसम्म बर्षा भएको थियो । आइतबार उत्तरी जर्जिया, साउथ क्यारोलिना, नर्थ क्यारोलिना, दक्षिणपूर्वी अलाबामा र फ्लोरिडामा समेत बाढीको चेतावनी दिइएको छ ।