न्युयोर्क सिटी मेयर पोलमा नेपाली समुदायका नजिक रहेका एरिक आडम्स पहिलो
प्रकाशित मिति : असार ४, २०७८ शुक्रबार
नेपाली टोपीमा एरिक आडम्स
न्युयोर्क सिटीको मेयरका लागि जुन २२ मा हुने प्राइमरी चुनावले यतिबेला न्युयोर्कबासीको ध्यान राम्ररी खिचेको छ । डेमोक्रेटिक प्राइमरीका लागि ८ जना उम्मेदबारहरु मैदानमा रहेका छन्, जसभन्दै सबैभन्दा चर्चा ४ उम्मेदबारहरुको रहेको छ ।
चुनावको पूर्वसन्ध्यामा न्युयोर्क पोष्टले पोलेस्टर म्याकलघ्लिनसँगको सहकार्यका गरेको सर्वेक्षणमा सबैभन्दा अग्रपंक्तिमा एरिक आडम्स देखिएका छन् । नेपाली समुदायको नजिक रहेका आडम्सको चुनावी अभियानका फण्डरेजमा न्युयोर्कको नेपाली समुदायले समेत सहयोग गरेको थियो ।
पूर्व ब्रुकलिन बोरो प्रेसिडेण्ड समेत रहेका आडम्सले कोरोना महामारीमा न्युयोर्कको नेपाली समुदायलाई उल्लेख्य सहयोग समेत गरेका थिए । साथै कोरोना महामारीमा अग्रपंक्तिमा रहेर योगदान दिने नेपाली समुदायका विभिन्न व्यक्तित्वहरुलाई सम्मान समेत गरेका थिए । नेपाली समुदायले आयोजना गर्ने विभिन्न कार्यक्रममा सहभागी हुदै आएका आडम्स न्युयोर्कको नेपाली समुदायको पहिलो छनौट रहदै आएका छन् ।
न्युयोर्कमा नेपालीहरुको संख्या झण्डै ५० हजार रहेको अनुमान गरिएको छ । जसमध्ये मतदान दिन योग्य नेपाली अमेरिकनहरु झण्डै १० हजारको हाराहारीमा रहेका छन् । चुनावमा अल्पसंख्यक समुदायको समेत निर्णायक भूमिका हुनसक्ने भएकाले कतिपय उम्मेदबारहरुले नेपाली समुदाय समक्ष पनि उल्लेख्य पहुच कायम गरिरहेका छन् ।
सर्वेक्षणमा एरिक आडम्सका पक्षमा २० प्रतिशत समर्थन देखिएको छ । मेयर बिल डे ब्लाजिओकी पूर्व सल्लाहकार माया विलेका पक्षमा र पूर्व सेनिटेशन विभाग प्रमुख क्याथरिन ग्रेसियाका पक्षमा बराबर १६ प्रतिशत समर्थन देखिएको छ । विगतमा अमेरिकी राष्ट्रपतिको चुनावमा डेमोक्रेटिक प्राइमरीमा मैदानमा देखिएका एन्ड्रयु याङ चौथो नम्बरमा देखिएका छन् । उनका पक्षमा जम्मा ९ दशमलव ६ प्रतिशत समर्थन देखिएको छ ।
सर्वेक्षणमा झण्डै १ हजार मतदाताहरु सहभागी रहेका थिए ।