न्युयोर्कमा गाडी पार्क गर्ने ठाउँबारे विवादहुँदा १५ बर्षको किशोरको चक्कु प्रहारबाट हत्या
प्रकाशित मिति : असार ४, २०७८ शुक्रबार
न्युयोर्क सिटीको बु्रकलिनमा गाडी पार्क गर्ने ठाउँबारे विवादहुँदा टोरी लोभिक नामका १५ बर्षका किशोरमाथि चक्कु प्रहार भएको छ । लोभिकलाई तत्कालै अस्पताल लगिएपनि अस्पतालले मृत घोषणा गरेको छ ।
गाडी पार्क गर्ने स्थानबारे लोभिक र ४८ बर्षको एकजना पुरुषबीच विवाद भएको थियो । त्यसपछि पुरुषले चक्कु निकालेर लोभिकमाथि प्रहार गरेको थियो ।
बु्रकलिनको डेकाटुर स्ट्रीटको १ सय ब्लकमा बिहिबार दिउसो साढे २ बजे उक्त घटना भएको प्रहरीले जनाएको छ । लोभिकको छातीमा चक्कु प्रहार भएको प्रहरीको भनाई छ । लोभिकले गाडी भने चलाएका थिएनन् ।
घटना लगत्तै लोभिकका पिता चक्कु प्रहार भएको स्थानमा आएका थिए । पिताले गाडी चलाएको र गाडी पार्क गर्न खोजेको साथै आक्रमण गर्ने व्यक्तिले पनि सोही स्थानमा नै गाडी पार्क गर्न खोजेको जनाइएको छ । घटनाबारे थप अनुसन्धान भइरहेको प्रहरीले जनाएको छ ।
प्रहरीले चक्कु प्रहार गर्ने व्यक्तिलाई नियन्त्रणमा लिएको छ । साथै चक्कु प्रहार गर्नेको परिचय र अन्य विवरण भने सार्वजनिक गरेको छैन । प्रहरीले ८१ औं प्रिसिन्टमा संदिग्धको बयान लिइरहेको छ ।