ओबामा केयरको सर्बोच्च अदालतमा तेश्रो पटक जीत
प्रकाशित मिति : असार ३, २०७८ बिहीबार
बिहिबार ओबामा केयरको अमेरिकाको सर्बोच्च अदालतमा तेश्रो पटक जीत भएको छ । सर्वोच्च अदालतमा ७ जना न्यायाधिसहरु ओबामा केयरको समर्थनमा र २ जना न्यायाधिसहरु विरोधमा देखिएपछि पछिल्लो रिपब्लिकन चुनौति अदालतबाट अस्वीकार भएको हो ।
टेक्सास र अन्य रिपब्लिकन नेतृत्वका राज्यहरुले ओबामा केयरबिरुद्ध मुद्दा दायर गरेका थिए । मुद्दा दायर गर्ने राज्यहरुले ओबामा केयरबाट आफूहरुलाई नोक्सान पुगेको प्रमाणित गर्न नसकेकाले उनीहरुको अनुरोधबिरुद्ध फैसला गरिएको न्यायाधिस स्टेफन ब्रेयरले बताएका छन् । मुद्दा दायर गर्ने राज्य वा व्यक्ति कसैले पनि ओबामा केयरका कारण नोक्सान हुने प्रमाणित गर्न नसकेको अदालतको निर्णयमा उल्लेख छ ।
बिहिबारको निर्णयको ओबामा केयरको मुख्य जीत हो । सन् २०१० मा तत्कालिन राष्ट्रपति बराक ओबामाले यो कानूनमा हस्ताक्षर गरेका थिए । त्यसयता उक्त कानून करोडौं अमेरिकनको स्वास्थ्य उपचारका लागि उत्तरदायी बन्दै आएको छ । अमेरिकाको स्वास्थ्य प्रणालीमा ओबामा केयर निकै महत्वपूर्ण तत्वका रुपमा रहेको छ ।
आधिकारिक रुपमा अफोर्डेबल हेल्थ केयरका रुपमा चिनिने ओबामा केयर सर्वोच्च अदालतमा तेश्रो पटक बच्न सफल भएको हो । ६ जना रुढिवादी र ३ जनामात्र प्रगतिशिल न्यायाधिसहरु रहेको सर्बोच्च अदालतमा ओबामा केयरको अन्त्य हुनसक्ने सम्भावनाबारे चिन्ता व्यक्त गरिएको थियो । तर रिपब्लिकन नियुक्त केही न्यायाधिसहरु समेत ओबामा केयरका पक्षमा देखिएपछि ओबामा केयरको जीत सम्भव भएको हो ।
सर्बोच्च अदालतका प्रधानन्यायाधिस जोन रोबर्टस, अन्य न्यायाधिसहरु स्टेफन ब्रेयर, क्लारेन्स थोमस, सोनिया सोटोमेयर, एलेना कागन, ब्रेट काभना र एमी कोने ब्यारेट ओबामा केयरका पक्षमा देखिएका थिए । काभना र ब्यारेट तत्कालिन राष्ट्रपति डोनाल्ड ट्रम्पबाट नियुक्त हुन्, जसले आफ्नो एक कार्यकालमा ओबामा केयरलाई अन्त्य गर्न निकै मिहिनेत गरेका थिए । सन् २०१७ मा संसदबाट ओबामाकेयरको अनिवार्य जरिवानाको प्रावधान भने हटाइएको थियो ।
बिहिबारको निर्णयमा दुईजना रुढीवादी न्यायाधिसहरु श्यामुअल एलिटो र निल गोर्साच भने ओबामा केयरका विपक्षमा उभिएका थिए । उपराष्ट्रपति कमला ह्यारिसकी डेपुटी प्रेस सेक्रेटरी सब्रिना सिंहले आज एकदम राम्रो दिन भएको भन्दै ट्वीट गरेकी छिन् ।
ओबामा केयर अन्तरगत करोडौंले स्वास्थ्य सुविधा प्राप्त गर्न सफल भएका छन् भने स्वास्थ्य विमा धेरैका लागि सस्तो भएको छ । ओबामा केयरले इन्सुरेन्स कम्पनीहरुलाई अनावश्यक रुपमा स्वास्थ्यविमाको रेट बढाउन समेत रोक लगाउँछ । साथै इन्सुरेन्स कम्पनीहरुले प्रिमियमको ८० प्रतिशत रकम मेडिकल केयर र सुधारमा लगाउनुपर्छ ।
क्यान्सर लगायतका पहिले देखि नै स्वास्थय समस्या भएकाहरुलाई पहिले स्वास्थ्य विमा लिन मुस्किल भएपनि ओबामा केयर अनुशार अधिकांश विमा कम्पनीहरुले विमा लिएकाहरुको पहिलेका त्यस्ता प्रकारका रोगहरुको पनि उपचार गर्नुपर्छ । त्यस्तै ओबामा केयर अगाडि बिमा कम्पनीहरुले दीर्घरोगीहरुमा खर्च गर्ने रकममा सिमा तोकिएकाले दीर्घरोगीहरु बिमाको कभरेजबाट बाहिर जाने सम्भावना हुन्थ्यो तर ओबामा केयरले त्यसलाई रोकेको छ ।
त्यस्तै धेरै प्रकारका स्वास्थ्य जाँचहरुलाई ओबामा केयरले समेट्छ भने डाक्टरले सिफारिस गरेका औषधीहरु पनि सस्तो हुने गर्छन् । ओबामाकेयर अन्तरगत बिरामीहरुले सन् २०१७ मा झण्डै २६ बिलियन डलर बचाएका थिए ।
पहिले नै स्वास्थ्य विमा रहेका बढी आम्दानी भएका केही व्यक्तिले ओबामा केयर अन्तरगत प्रिमियम रकम बढी तिर्नुपर्ने भएकाले ओबामा केयरको विरोध समेत हुने गरेको छ । स्वास्थ्य विमा नभएकाहरुलाई जरिवाना गर्ने प्रावधान समेत रहेकोमा उक्त प्रावधानको विरोध भएको थियो । जुन प्रावधान ट्याक्स बर्ष २०१९ देखि हटाइसकिएको छ ।
त्यस्तै बढी आम्दानी भएकाहरुको कर बढ्ने, धनीहरुले तिरेको रकमबाट कम आम्दानी भएकाहरुको बिमा कभर हुने अवस्थाका कारण पनि यसको विरोध भएको थियो । कतिपय व्ययवसायहरुले त पूर्णकालिन कामदार राख्दा बिमा रकम बढी तिर्नुपर्ने हुँदा कामदारको काम गर्ने घण्टा समेत घटाइदिएका थिए ।