एप्पलवाच प्रयोगकर्ताहरु सुतेको बेला ९११ मा फोन गएपछि प्रहरी हैरान
प्रकाशित मिति : असार ३, २०७८ बिहीबार
Photo by Daniel Cañibano on Unsplash
एप्पल वाच प्रयोगकर्ताहरु सुतेको बेला ९११ मा फोन गएपछि अमेरिकामा प्रहरी नै हैरान भएको छ । एप्पल वाच प्रयोगकर्ताबाट झुक्किएर आएका यस्ता कैयन फोनकलहरु प्राप्त गरेको र यसका कारण प्रहरीको स्थानीय श्रोतमा क्षति पुगेको कन्सास प्रहरीले जनाएको छ ।
झुक्किएर आएका फोनकल उठाउँदा कहिलेकाँही प्रहरीमा आएका आपतकालिन फोनकलहरु समेत पछि पर्ने गरेका छन् । अधिकांशले सुतेका बेला दबाइएर फोन गएका कारण प्रहरीमा फोन गरेको समेत थाहा नपाउने गरेका छन् ।
कतिपय अवस्थामा प्रहरीले फोन उठाएपछिमात्र एप्पल वाच प्रयोगकर्ताहरुले फोन गएको थाहा पाउने गरेको ओभरल्याण्ड पार्क प्रहरीका प्रवक्ताले जनाएका छन् । एप्पल वाचको आपतकालिन एसओएस फिचरका कारण झुक्किएर फोन जाने गरेको जनाइएको छ ।
यो फिचर साइड बटनमा लामो समय थिचेपछि सुरुवात गर्न सकिने भएपनि यो फिचरलाई निस्कृय समेत पार्न सकिन्छ । एप्पल वाच प्रयोगकर्ताहरुले सुतेको बेला उक्त फिचर झुक्किएर सकृय हुँदा ९११ मा फोनकल जाने गरेको छ ।
झुक्किएर फोन जाने समस्या टार्न एप्पल वाचका लागि संरक्षित खोल प्रयोग गर्न सुझाव दिइएको छ । त्यसो गर्दा झुक्किएर वा सजिलै साइड बटनमा थिच्न र होल्ड गर्न सकिनेछैन ।
एप्पल वाचमा प्रयोगकर्तालाई आपतकालिन अवस्था आएको बेला छिटो सहायता प्राप्त गर्नका लागि आपतकालिन एसओएस सेवा डिजाइन गरिएको हो । एप्पलको आफ्ना उत्पादनमार्फत स्वास्थ्य र सुरक्षामा ध्यान दिने नीति अन्तरगत यो विशेषता आएको हो ।