नाबालिग छँदै सरकारविरोधी दंगामा सहभागी भएको अभियोगमा साउदी अरबमा मुस्तफालाई मृत्युदण्ड
प्रकाशित मिति : असार ३, २०७८ बिहीबार
नाबालिग छँदै सरकारविरोधी दंगामा सहभागी भएको अभियोगमा साउदी अरबमा एकजना युवालाई मृत्युदण्ड दिइएको छ । मुस्तफा अल डार्विसलाई सन् २०११ वा २०१२ मा सरकारविरोधी दंगामा सहभागी भएको अभियोगमा सन् २०१८ मा मृत्युदण्डको सजाय सुनाइएकोमा मंगलबार मृत्युदण्ड दिइएको हो ।
एम्नेष्टी इन्टरनेशनल लगायतका मानवअधिकारवादी संस्थाहरुले मुस्तफालाई दिइएको मृत्युदण्डको निन्दा गरेका छन् । सरकारविरोधी दंगामा सहभागी भएको बखत उनी १८ बर्षभन्दा कम उमेरका थिए । तर साउदी सरकारले उनलाई सुरक्षा अधिकारीको हत्या गर्ने उद्देश्यले आतंककारी सेल निर्माण गरेको अभियोग लगाएको थियो ।
मुस्तफाका परिवारलाई मृत्युदण्ड कार्यान्वयन अगाडि सरकारका तर्फबाट कुनै सुचना दिइएको थिएन । संचारमाध्यमहरुमा प्रकाशित समाचारहरु पढेर उनीहरुले मुस्तफालाई मृत्युदण्ड दिइएको थाहा पाएका थिए । साउदी अरबले नाबालिग हुँदै गरेको अपराधका लागि मृत्युदण्ड खारेज गरिरहेको भन्दै सन् २०२० मा सरकार समर्थित मानव अधिकार आयोगले रिपोर्ट प्रकाशित गरेको थियो ।
नाबालिग अवस्थामा गरेको अपराधका लागि दोषी ठहरिएमा १० बर्षसम्मको जेलसजाय दिइने आयोगको रिपोर्टमा उल्लेख थियो । तर यो निर्णय कहिलेदेखि कार्यान्वयन हुने भन्नेबारे स्पष्ट छैन । यसअगाडि १७ बर्षको उमेरमा पक्राउ परेका अलि अल निमरलाई पनि नाबालिग अवस्थामा गरेको अपराधका लागि दोषी ठहर गर्दै गत फरबरीमा मृत्युदण्ड दिइएको थियो ।
त्यस्तै १३ बर्षको उमेरमा गरेको अपराधमा दोषी ठहरिएको भन्दै मृत्युदण्डको सजाय सुनाइएका मुर्तजा क्वीरीसलाई अन्तर्राष्ट्रिय समुदायको चर्को विरोधपछि मृत्युदण्ड नदिएर सन् २०१९ मा १२ बर्षको जेल सजाय सुनाइएको थियो । उनलाई १३ बर्षको उमेरमा सरकारविरोधी प्रदर्शनमा सहभागी भएको आरोप लगाइएको थियो ।