विश्वासको मत पाउन नसकेपछि गण्डकीका मुख्यमन्त्री पदमुक्त


प्रकाशित मिति : जेष्ठ २७, २०७८ बिहीबार

गण्डकी प्रदेशका मुख्यमन्त्री पृथ्वीसुब्बा गुरुङ पदमुक्त भएका छन्। विहीबार प्रदेशसभामा दोस्रोपटक विश्वासको मत पाउन नसकेपछि गुरुङ पदमुक्त भएका हुन्।

गुरुङले पेश गरेको विश्वासको मतको प्रस्तावको पक्षमा २७ र विपक्षमा ३० मत परेको छ। मतदानमा ५८ सांसद उपस्थित भएकोमा १ जना तटस्थ रहे। केही दिनअघि मन्त्री बनाइएका स्वतन्त्र सांसद दीपक मनाङे भने अनुस्थित रहे।

वैशाख २९ गते प्रदेश प्रमुख सीताकुमारी पौडेलबाट मुख्यमन्त्री नियुक्त भएका गुरुङले ३० दिनभित्र विश्वासको मत लिनुपर्ने संवैधानिक व्यवस्थाअनुसार विश्वासको मत लिन प्रदेशसभामा प्रस्ताव पेश गरेका थिए।

६० सदस्य रहेको गण्डकी प्रदेशमा बहुमत पुर्‍याउन मुख्यमन्त्री गुरुङलाई ३१ सांसदको समर्थन जरूरी थियो।

गण्डकी प्रदेशसभामा एमालेका २७ सांसद छन्। विपक्षी गठबन्धन नेपाली कांग्रेसका १५, माओवादी केन्द्रका १२, राष्ट्रिय जनमोर्चाका ३ र जनता समाजवादी पार्टीका २ जना सांसद छन्।

अब प्रदेशसभाको कुनै एक सदस्यले बहुमत प्राप्त गर्न सक्ने आधारसहित प्रदेश प्रमुख समक्ष दाबी गर्ने विकल्प बाँकी छ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com