न्यूयोर्कका नवनिर्वाचित मेयर माम्दानीका निर्देशकद्वारा नियुक्तिको एक दिनमै राजीनामा
प्रकाशित मिति : पुस २, २०८२ बिहीबार
अमेरिकाको न्यूयोर्क सिटीका नवनिर्वाचित मेयर जोहरान माम्दानीका एक निर्देशकले पदबाट राजीनामा दिएकी छिन्। हालै नियुक्त निर्देशक क्याथरिन अल्मोन्टे दा कोस्टाले कार्यभार सम्हालेको एक दिनमै राजीनामा दिएकी हुन्।
दशकौँ पुराना सामाजिक सञ्जालका पोस्टहरूमा यहूदीविरोधी धारणाहरू झल्किएको भन्दै उनले राजीनामा दिएकी हुन्। आफ्ना विगतका टिप्पणीहरू सार्वजनिक भएपछि कोस्टाले केही घण्टामै राजीनामा पेस गरेको बताइएको छ।
राजीनामा दिँदै उनले भनिन्, “यहूदी सन्तानकी आमा भएको नाताले, मेरा शब्दहरूले पुर्याएको क्षतिप्रति म गहिरो दुःख र पश्चात्ताप महसुस गर्दछु।” उनले यी पुराना टिप्पणीका कारण हालको कार्यमा बाधा पुग्ने भएकाले पद छाड्ने निर्णय गरेको स्पष्ट पारिन्।
मेयर माम्दानीले यहूदी समुदायको समर्थन जित्न पहिलेदेखि नै चुनौती सामना गरिरहेका छन्। इजरायलप्रतिको उनको आलोचना र “ग्लोबलाइज द इन्तिफादा” भन्ने नाराको स्पष्ट निन्दा नगरेको भन्दै यहूदी समुदायले उनको उम्मेदवारीको कडा विरोध गरेको थियो। उनका शीर्ष सहयोगीका पुराना ट्वीटहरू सार्वजनिक भएपछि यो विभाजन झन् गहिरिएको देखिन्छ।
यस विषयमा ‘एन्टी–डिफेमेसन लिग’ ले सामाजिक सञ्जालमार्फत कडा प्रतिक्रिया जनाएको छ। संस्थाको न्युयोर्क र न्युजर्सी च्याप्टरले भनेको छ, “‘पैसाको लोभ गर्ने यहूदीहरू’ भन्ने आशयका ट्वीट कुनै पनि हालतमा स्वीकार्य छैनन्।” संगठनले दा कोस्टाका धेरै पोस्टहरू यहूदीविरोधी धारणासँग मेल खाने बताएको छ।
दा कोस्टाले ती टिप्पणीहरू आफू १९-२० वर्षको उमेरमा छँदा गरेको भन्दै माफी मागेकी छिन्। मेयर माम्दानीले पनि ती टिप्पणीहरूको निन्दा गरेका छन्।
माम्दानीले एक विज्ञप्ति जारी गर्दै भनेका छन्, “क्याथरिनले आफ्ना विगतका वक्तव्यप्रति गहिरो पश्चात्ताप व्यक्त गर्दै राजीनामा पेस गरिन्, जुन मैले स्वीकार गरेको छु।”
यस घटनाले सत्ता हस्तान्तरण टोलीको पृष्ठभूमि जाँच प्रक्रियामाथि गम्भीर प्रश्न उठाएको छ। यति धेरै निगरानीमा रहने प्रशासनमा कसैलाई नियुक्त गर्नुअघि सजिलै जाँच गर्न सकिने यस्ता विषय किन छुटे भन्ने प्रश्न उठ्न थालेको छ।
ट्रान्जिसन टोलीले भने दा कोस्टालाई नियुक्त गर्दा ती पोस्टहरूबारे जानकारी नभएको दाबी गरेको छ। दा कोस्टा डोमिनिकन गणतन्त्रमा जन्मिएकी हुन्।