टिकटकमा प्रतिबन्ध लगाउने ट्रम्पको आदेश बाइडेनबाट खारेज, विदेशी एपको जोखिमबारे छानविन गरिने
प्रकाशित मिति : जेष्ठ २६, २०७८ बुधबार
अमेरिकामा लोकप्रिय चाइनिज एप्लीकेशन टिकटकमा प्रतिबन्ध लगाउने पूर्व राष्ट्रपति डोनाल्ड ट्रम्पको आदेशलाई राष्ट्रपति जो बाइडेनले खारेज गरिदिएका छन् । बाइडेनले बुधबार विदेशी एप्लीकेशनहरुको जोखिम मूल्यांकनका लागि मापदण्डहरु तय गर्ने कार्यकारी आदेश जारी गरेका हुन् ।
बाइडेनले टिकटक र वीच्याटको कारोबारलाई प्रतिबन्ध लगाउने पूर्व राष्ट्रपति ट्रम्पका तीनवटा कार्यकारी आदेश खारेज गरिदिएका हुन् । ट्रम्पका तीनवटा कार्यकारी आदेशमध्ये दुईवटा टिकटक र वीच्याटको कारोबारलाई प्रतिबन्ध लगाउने तथा एउटा टिकटकमाथि प्रतिबन्ध लगाउने रहेको थियो । ट्रम्पले टिकटकमा प्रतिबन्ध लगाउन खोजेपनि सफल भएका थिएनन् भने लामो कानूनी लडाई चलेको थियो । जसका कारण टिकटक अमेरिकामा उपलब्ध र लोकप्रिय रहिरह्यो ।
बाइडेनले कार्यकारी आदेशमार्फत विदेशी एप्लीकेशनहरुबाट ठूलो जोखिम भए नभएकोबारे मूल्यांकन गर्न डिपार्टमेन्ट अफ कमर्शलाई निर्देशन दिएका छन् । कुनै एप्लीकेशन विदेशी सैन्य वा खुफिया सेवाहरुलाई फाइदा पुग्नेगरी वा उनीहरुको पहुच हुनेगरी संचालन भएको भएमा वा कुनै एप्लीकेशनले व्यक्तिका संवेदनशिल डाटाहरु संकलन गरेको अवस्थामा त्यस्तो अवस्थालाई ठूलो जोखिमका रुपमा व्याख्या गरिएको छ ।
विदेशीहरुबाट अमेरिकी उपभोक्ताहरुका डाटाहरु दुरुपयोग हुनबाट संरक्षण प्रदान गर्नका लागि कमर्श डिपार्टमेन्टलाई अन्य एजेन्सीहरुसँग मिलेर काम गर्न पनि बाइडेनले निर्देशन दिएका छन् । यदि त्यस्ता जोखिमहरुलाई सम्बोधन गर्न थप कार्यकारी आदेश वा नियम कानून आवश्यक भएमा सुझाव दिन समेत बाइडेनले निर्देशन दिएका छन् ।
विगतमा ट्रम्पले टिकटक अमेरिकन कम्पनीलाई बिक्रि नगरे अमेरिकामा प्रतिबन्ध लगाउने कार्यकारी आदेश जारी गरेका थिए । त्यसपछि टिकटकले विभिन्न कम्पनीहरुसँग सम्झौताको प्रयास गरेको थियो ।