अमेरिकी सरकारले पत्रकारले श्रोतलाई सम्पर्क गरेका रेकर्डहरु कब्जा नगर्ने
प्रकाशित मिति : जेष्ठ २३, २०७८ आईतबार
अमेरिकी सरकारको डिपार्टमेन्ट अफ जस्टिसले पत्रकारहरुले समाचार संकलनका क्रममा विभिन्न श्रोतहरुलाई सम्पर्क गरेका रेकर्डहरु कब्जा नगर्ने भएको छ । समाचार संस्था र प्रेस स्वतन्त्रता सम्बन्धि समुहहरुले विगतमा सरकारको डिपार्टमेन्ट अफ जस्टिसले पत्रकारका रेकर्डहरु गोप्य रुपमा कब्जा गर्दै आएकोमा निन्दा गर्दै आएका थिए ।
राष्ट्रपति जो बाइडेनले गतमहिना पत्रकारका रेकर्डहरु सरकारले कब्जा गर्नु एकदमै गलत भएको बताएका थिए । उनले यो अभ्यासलाई निरन्तरता दिनबाट डिपार्टमेन्ट अफ जस्टिसलाई रोक्ने समेत बताएका थिए । त्यस लगत्तै डिपार्टमेन्ट अफ जस्टिसले आफ्नो नीतिमा परिवर्तन गर्दै पत्रकारका रेकर्डहरु कब्जा नगर्ने बताएको हो ।
पत्रकारहरुले सरकारका गोप्य सुचनाहरु सार्वजनिक गरेको अवस्थामा श्रोत पत्ता लगाउनका लागि विगतमा डेमोक्रेटिक र रिपब्लिकन प्रशासन दुबैले पत्रकारहरुका फोन वा इमेल सम्पर्कका लगायतका रेकर्डहरु प्राप्त गर्न अदालतका आदेश वा सुचनाहरुको प्रयोग गर्दै आएका थिए । हालै डिपार्टमेन्ट अफ जस्टिसले वासिंटन पोष्ट, न्युयोर्क टाइम्स र सीएनएनका पत्रकारहरुका फोन रेकर्डहरु ट्रम्प प्रशासनका पालामा नै आफूहरुले प्राप्त गरेको भन्दै तीनवटा समाचार संस्थाका पत्रकारहरुलाई अलर्ट गराएको थियो ।
न्युयोर्क टाइम्सले शुक्रबार चारजना पत्रकारहरुको इमेल रेकर्ड प्राप्त गर्नका लागि गोप्य अदालती लडाईबारे खुलासा गर्न संचारमाध्यमलाई रोक लगाउने गलत आदेशबारे समाचार प्रकाशित गरेको थियो । ह्वाइट हाउसकी प्रेस सेक्रेटरी जेन पास्कीले न्युयोर्क टाइम्समा समाचार प्रकाशित हुनु अगाडि ह्वाइटहाउसमा कसैलाई पनि त्यस्तो आदेशबारे थाहा नभएको शनिबार बताएकी थिइन् ।
छुट्टै वक्तक्यमा जस्टिस डिपार्टमेन्टका प्रवक्ता एन्थोनी कोलेले अबदेखि जस्टिस डिपार्टमेन्टले संचारमाध्यमका सदस्यहरुले आफ्नो काम गर्ने क्रममा श्रोतहरुलाई सम्पर्क गरेका रेकर्डहरु प्राप्त गर्न कुनै कानूनी प्रकृया नचाल्ने बताएका छन् । लामो समयदेखिको अभ्यासमा परिवर्तन गर्दै स्वतन्त्र प्रेस र पहिलो संसोधनलाई महत्व दिदै पत्रकारको स्वतन्त्रताको सुनिश्चित गर्न उचित कदम चालिने उनले बताएका छन् ।