एरिक आडम्स न्युयोर्क सिटी मेयरमा निर्वाचित भए जातीय र सामुदायिक मिडिया अफिस बनाउने
प्रकाशित मिति : बैशाख २३, २०७८ बिहीबार
डेमोक्रेटिक प्राइमरीमा न्युयोर्क सिटीको मेयरका उम्मेदबार एरिक आडम्सले आफू निर्वाचित भएमा मेयर अफिसमा जातीय र समुदायिक मिडियाको कार्यालय समेत स्थापना गर्ने योजना घोषणा गरेका छन् । उक्त अफिसले न्युयोर्कमा रहेका जातीय विविधता भएका समुदायहरु तथा विभिन्न भाषाका जातीय र सामुदायिक मिडियाप्रतिको न्युयोर्क सिटीको प्रतिबद्धतालाई विस्तार गर्नेछ ।
आर्थिक संकट र महामारीबाट पुनर्जीवन प्राप्त गर्दै गर्दा न्युयोर्क सिटीको आर्थिक, सामाजिक, सांस्कृतिक र नागरिक जीवनशक्ति ती समुदायहरुमा भर पर्ने आडम्सको अभियानबाट जारी वक्तब्यमा उल्लेख छ । एरिक आडम्सले भनेका छन् – ‘हाम्रो सिटी अमेरिकामा नै सबैभन्दा बढी विविधता भएको सिटी हो । र उक्त विविधताको प्रतिनिधित्व पाँचवटै बरोमा रहेका जातीय र सामुदायिक मिडियाहरुले प्रतिनिधित्व गर्छन् ।’
‘यी मिडयाहरुले हाम्रो समुदायलाई शशक्त बनाउन खेलेको भूमिकाप्रति म वास्तवमै कृतज्ञ छु । न्युयोर्कबासीहरुका लागि अत्यावश्यक सुचनाहरु प्रदान गर्ने कामको निरन्तरताका लागि ती मिडियाहरुलाई आवश्यक पर्ने साधनश्रोतको विस्तारका लागि म प्रतिबद्ध छु ।’ – एरिक आडम्सले भने ।
बु्रकलिन बोरो प्रेसिडेण्ट समेत रहेका आडम्सले सिटी काउन्सिल सदस्य इडानिस रोड्रिगेजसँगको सहकार्यमा यसै महिनाको अन्तिममा प्रस्तावित बिल समेत पेश गर्ने भएका छन् ।
मेयर अफिसमा जातीय र समुदायिक मिडियाको कार्यालयले ५ जनाभन्दा कम कर्मचारी भएका जातीय तथा सामुदायिक रेडियो र टिभी स्टेशनलाई सिटीभर विस्तार गर्न सहयोग गर्नेछ । सामुदायिक र जातीय संचारमाध्यमलाई विज्ञापनहरु उपलब्ध गराउने लगायतका काम गर्नुका साथै अत्वाश्यक सुचनाहरु र श्रोतहरु उपलब्ध गराउनेछ । जातीय र सामुदायिक मिडियामा सरकार सम्बन्धित सुचना र घोषणाहरुको निष्पक्ष र बराबर वितरणको सुनिश्चितता गर्नेछ ।
५ जनाभन्दा कम कर्मचारीका साथ अल्पसंख्यक र महिलाहरुले संचालन गरेका मिडियाहरुलाई मिडिया अभियान र विशेष योजनाहरु संचालनका लागि सिटी एजेन्सीलाई प्रकृया अगाडि बढाउन सहज बनाइने समेत जनाइएको छ ।
अहिले कार्यकारी आदेशले सिटी एजेन्सीहरुलाई बार्षिक विज्ञापनको आधा रकम सामुदायिक र जातीय संचारमाध्यममा खर्च गर्नुपर्ने व्यवस्था गरेको छ । यो रकम सन् २०२० मा १० मिलियन डलर रहेको थियो । यसमा सामुदायिक टेलिभिजन र रेडियो समावेश छैनन् । न्युयोर्क सिटीमा झण्डै ३ सय सामुदायिक र जातीय मिडियाहरु संचालनमा रहेका छन् ।