अमेरिकी राष्ट्रपतिको पहिलो विदेश भ्रमण युके र बेल्जियम, उपराष्ट्रपतिको मेक्सिको र ग्वाटेमाला
प्रकाशित मिति : बैशाख २२, २०७८ बुधबार
अमेरिकी उपराष्ट्रपति कमला ह्यारिसको पहिलो विदेश भ्रमण मेक्सिको र ग्वाटेमाला हुने भएको छ । आगामी जुन ७ र ८ मा ह्यारिसले यी देशहरुको भ्रमण गर्ने जनाइएको छ । यो उनको उपराष्ट्रपतिको हैसियतमा पहिलो विदेश भ्रमण हुनेछ ।
ह्यारिस र मेक्सिकोका राष्ट्रपति आन्द्रेस म्यानुअल लोपेजबीच यसैसाता पनि कुराकानी हुने जनाइएको छ । उनीहरुबीच अमेरिका लक्ष्यीत आप्रवासनका सन्दर्भमा कुराकानी हुने उपराष्ट्रपति ह्यारिसले जानकारी दिएकी छिन् ।
गत मार्चमा राष्ट्रपति जो बाइडेनले दक्षिणी सिमानामा आप्रवासन सन्दर्भमा अमेरिकी प्रयासको नेतृत्वका लागि ह्यारिसलाई जिम्मा दिएका थिए । मेक्सिको र उत्तरी त्रिभुज देशहरुसँगको आप्रवासन सम्बन्धमा अमेरिकी प्रयासलाई नेतृत्वका लागि ह्यारिस सबैभन्दा योग्य व्यक्ति रहेको बाइडेनले बताएका थिए ।
राष्ट्रपति जो बाइडेनले भने राष्ट्रपतिका रुपमा पहिलो विदेश भ्रमण बेलायत र बेल्जियम गर्ने भएका छन् । आगामी जुनमा बाइडेनले बेलायतमा हुने जी सेभेन सम्मेलन र ब्रसेल्समा हुने नाटो बैठकमा भाग लिनेछन् ।
बाइडेनले एकसयदिनको अवधिमा ९ वटाराज्यको भ्रमण गरेका छन् । जबकी ट्रम्पले यो अवधिमा १० वटा राज्यको भ्रमण गरेका थिए भने ओबामाले ११ वटा राज्यको भ्रमण गरेका थिए । एकसयदिनको अवधिमा बाइडेनले कुनै पनि विदेश भ्रमण भने गरेका छैनन् । ट्रम्पले पनि एकसयदिनमा कुनै देश भ्रमण गरेका थिएनन् । ओबामाले भने ९ वटा देशको भ्रमण गरेका थिए ।
