ट्रम्पको फेसबुक एकाउन्टमा प्रतिबन्ध लगाउने निर्णयमा निरीक्षण बोर्डको समर्थन
प्रकाशित मिति : बैशाख २२, २०७८ बुधबार
फेसबुकको निरीक्षण बोर्डले पूर्व राष्ट्रपति डोनाल्ड ट्रम्पको फेसबुक एकाउन्टमाथि लगाएको प्रतिबन्धलाई अहिलेका लागि समर्थन गरेको छ । तर फेसबुकले ट्रम्पको एकाउन्टमा अनिश्चितकालका लागि प्रतिबन्ध लगाउनु गलत भएको ठहर गरेको छ ।
निरीक्षण बोर्डले फेसबुकलाई कुन मापदण्डका आधारमा प्रतिबन्ध लगाइएको भन्ने सन्दर्भमा जवाफ दिन ६ महिनाको अवधि दिएको छ । ट्रम्पको फेसबुक एकाउन्टबारे निरीक्षण बोर्डको निर्णय बहुप्रतिक्षित रहेको थियो । जनवरी ६ मा संसदमा ट्रम्प समर्थकहरुले संसद भवनमा हुलदंगा गरेपछि ट्रम्पको फेसबुकमा प्रतिबन्ध लगाउनु कम्पनीको निर्णय सही भएको बोर्डले ठहर गरेको छ ।
तर स्पष्ट मानक विना नै फेसबुकले ट्रम्पको एकाउन्टमा प्रतिबन्ध लगाएको बोर्डको भनाई छ । कम्पनीले प्लेटफर्मका अन्य प्रयोगकर्ताहरुमा लागु हुने नियम अनुरुप नै ट्रम्पको फेसबुक एकाउन्टका बारेमा निर्धारण गर्नुपर्ने बोर्डले जनाएको छ ।
कम्पनीले ट्रम्पको एकाउन्ट पुनस्थापना गर्ने, अस्थायी रुपमा खारेज गर्ने वा स्थायीरुपमा प्रतिबन्ध लगाउने भन्नेबारे निर्धारण गर्नसक्ने बोर्डले जनाएको छ । ट्रम्पले आफूलाई फेसबुकमा प्रतिबन्ध लगाइनु पूर्णरुपमा अपमान रहेको र कम्पनीले त्यसको राजनीतिक मूल्य तिर्नुपर्ने चेतावनी दिएको थियो ।