भारतबाट र विगत १४ दिनभित्र भारत गएकाहरु अमेरिका आउनमा यात्रा प्रतिबन्धको घोषणा
प्रकाशित मिति : बैशाख १७, २०७८ शुक्रबार
अमेरिकी राष्ट्रपति जो बाइडेनले भारतबाट अमेरिका आउनमा अधिकांशलाई यात्रा प्रतिबन्धको घोषणा गरेका छन् । भारतमा कोरोना महामारी तीब्र बनेपछि शुक्रबार गैर नागरिक लगायतलाई भारबाट अमेरिकामा आउनमा यात्रा प्रतिबन्धको घोषणामा बाइडेनले हस्ताक्षर गरेका हुन् ।
नयाँ प्रतिबन्ध मे ३ को राती १२ बजेपछि अर्थात् मे ४ मंगलबार सुरु हुनासाथ लागु हुने भएको छ । भारतमा कोरोना महामारी बढ्दो रहेकाले अमेरिकन सीडीसीको सल्लाहमा यस्तो प्रतिबन्ध लगाइएको ह्वाइट हाउसले जनाएको छ ।
विश्वभर देखिएका कोरोनाका संक्रमणहरुमा एक तिहाई भारतमा देखिएको र अमेरिका प्रवेश गर्ने यात्रुहरुबाट अमेरिकाको जनस्वास्थ्यलाई संरक्षण गर्नुपर्ने भएकाले नयाँ मापदण्डको आपश्यकता रहेको प्रतिबन्धमा उल्लेख छ । यो प्रतिबन्ध अनुशार विगत १४ दिनमा भारतमा रहेका अमेरिकी नागरिकबाहेकका अधिकांश यात्रुहरुलाई अमेरिका आउनमा रोक लगाइएको छ ।
ग्रिनकार्डवाहक, परिवारका सदस्यहरु र विद्यार्थी लगायतका अन्य केही गैर नागरिकहरुलाई भने अमेरिका आउनमा छुट दिइएको छ । भारतमाथि लगाइएको यात्रा प्रतिबन्धको निर्णय एकदमै छिटो गरिएको र २४ घण्टामै यो निर्णयमा पुगिएको जनाइएको छ ।
भारतमा विगत ९ दिनदेखि हरेक दिन ३ लाखभन्दा बढी कोरोना संक्रमण पुष्टी भइरहेका छन् । शुक्रबारमात्र भारतमा थप कोरोना संक्रमण पुष्टी हुनेहरुको संख्या ३ लाख ८६ हजार ४ सय ५२ रहेको थियो ।
बेलायत, जर्मनी, इटली र सिंगापुर लगायतले पनि भारतबाट आउने यात्रुहरुमाथि यस्तै प्रतिबन्धहरु लगाएका छन् । क्यानडा, हङकङ र न्युजिल्याण्ड लगायतले त भारतसँगका सबै व्यापारिक उडानहरु स्थगित गरेका छन् ।