मे १ बाट न्युजर्सीमा कागजपत्रविहिनलाई पनि ड्राइभर लाइसेन्स
प्रकाशित मिति : बैशाख १४, २०७८ मंगलबार
न्युजर्सीमा पनि अब कागजपत्रविहिनहरुले ड्राइभर लाइसेन्स पाउने भएका छन् । अमेरिकामा गैरकानुनी रुपमा प्रवेश गरेकाहरुलाई ड्राइभर लाइसेन्स प्रदान गर्ने १५ राज्यको समुहमा अब न्युजर्सी पनि थपिएको छ ।
गभर्नर फिल मर्फीले लामो बहस पछि यो बिललाई सन् २०१९ को डिसेम्बरमा नै हस्ताक्षर गरेका थिए । गत जनवरीदेखि कार्यान्वयनमा आउने बताइएपनि केही ढिलो भएकाले मे १ बाट कागजपत्रविहिनले ड्राइभर लाइसेन्सका लागि प्रकृया अगाडि बढाउन सक्नेछन् ।
जनवरी १ देखि लागु हुने योजना महामारीका कारण ढिलाई भएको थियो । अब न्युजर्सीमा रहेका झण्डै ४ लाख ७५ हजार कागजपत्रविहिनहरुमध्ये ४ लाखले ड्राइभर लाइसेन्स वा स्टेट आईडी प्राप्त गर्नसक्ने भएका छन् ।
यसअघि न्युयोर्कमा कागजपत्रविहिनलाई ड्राइभर लाइसेन्स दिने नियम कार्यान्वयनमा आएको छ । न्युयोर्क राज्यको दुबै सदनले पारित गरेको कागजपत्रविहिनलाई पनि लाइसेन्स प्रदान गर्ने नियम सन् २०१९ को डिसेम्बरदेखि लागु भएको हो ।
विधयेकले न्युयोर्क राज्यमा जुनसुकै अध्यागमन स्टाटस भएको आप्रवासीले पनि ड्राइभर लाइसेन्स पाउने प्रावधानलाई ब्यूताएको थियो । यस्तो प्रावधान न्युयोर्कमा सन् २००१ भन्दा अगाडि विद्यमान थियो ।
