न्युयोर्क सिटीमा एकैदिनमा विभिन्न घटनामा १५ जनामाथि गोली प्रहार, जनवरी यता ४१० जनामाथि गोली
प्रकाशित मिति : बैशाख १२, २०७८ आईतबार
न्युयोर्क सिटीमा एकैदिनमा भएका विभिन्न घटनामा १५ जनामाथि गोली प्रहार भएको छ । शनिबार भएका विभिन्न घटनामा १५ जनामाथि गोली प्रहार भएको प्रहरीले जनाएको छ । गतबर्षको सोही दिनमा न्युयोर्क सिटीमा एकजनामाथि गोली प्रहार भएको थियो ।
शनिबारसम्मको तथ्यांक हेर्दा यो बर्षमात्र झण्डै साढे तीनमहिनाको अवधिमा न्युयोर्क सिटीमा ४१० जनामाथि गोली प्रहार भएको छ । गतबर्षको सोही अवधिमा जम्मा २ सय ३८ जनामाथि गोली प्रहार भएकोमा यो बर्ष गोली प्रहारको घटनामा उल्लेख्य बृद्धि भएको छ ।
कोरोना महामारी सम्बन्धित प्रतिबन्धहरु नरम बनाइदा पनि गोलीकाण्डका घटनाहरुमा कमी भएको छैन । गोलीकाण्डका घटना महामारीसँग सम्बन्धित भन्दा धेरै अपराध न्याय प्रणालीमा परिवर्तनसँग सम्बन्धित भएको हाल जोन जे कलेजका प्रोफेशर रहेका पूर्व न्युयोर्क प्रहरी युजिन ओडनिलले बताएका छन् ।
प्रहरीलाई कमजोर बनाइएको र अभियोजनकर्ताहरुलाई बहाना मिलेका कारण न्युयोर्क सिटीमा गोलीकाण्डका घटनाहरु बढेको उनले बताए । अहिलेको अवस्थामा न्युयोर्क सिटीमा बन्दुक बोक्न चाहनेहरुका लागि सुनौलो युग रहेको उनले बताए ।
प्रहरीहरु अपराधीलाई पक्राउ गर्न डराउने अवस्था रहेको र अभियोजनकर्ताहरु अपराधीहरुलाई जेलबाहिर राख्न चाहेका कारण यो अवस्था आएको उनको भनाई छ । कैयन बर्षसम्म न्युयोर्कले अमेरिकाको सुरक्षित सिटीका रुपमा परिचय बनाएपनि पछिल्ला दिनमा भने यो परिचय बदलिदै गएको छ । न्युयोर्क सिटी असुरक्षित बन्दै गएको छ ।