लङ आइल्याण्डमा ग्रोसरी स्टोरभित्र गोली चलाउने व्यक्ति ४ घण्टामा पक्राउ
प्रकाशित मिति : बैशाख ७, २०७८ मंगलबार
घण्टौं लामो पैयासपछि न्युयोर्कको लङ आइल्याण्डमा ग्रोसरी स्टोरभित्र गोली चलाउने ३० बर्षको ग्रयाब्रियल डेविट विल्सनलाई प्रहरीले नियन्त्रणमा लिएको छ । घटना लगत्तै प्रहरीले ग्रयाब्रियललाई अत्यन्तै सकृय रुपमा खोजिरहेको थियो ।
न्युयोर्कको लङ आइल्याण्डको वेष्ट हेम्पस्टीडमा रहेको स्टप एण्ड सप नामको ग्रोसरी स्टोरमा मंगलबार विहान भएको गोलीकाण्डमा कम्तीमा एकजनाको मृत्यु भएको थियो भने दुईजना घाइते भएका थिए । घाइतेहरुको अस्पतालमा उपचार भइरहेको छ ।
मृत्यु हुने व्यक्ति ४९ बर्षका पुरुष रहेको जनाइएको छ । मृतक त्यही काम गर्ने कामदार रहेको जनाइएको छ । गोली चलाउँदा स्टोरमा केही सय व्यक्तिले किनमेल गरिरहेका थिए ।
प्रहरीले गोली चलाउने व्यक्ति ग्रयाब्रियल कालो पोशाकमा सरासर स्टोरको माथिल्लो तलामा गएर तीनजनालाई गोली हानेको थियो । गोली चलाउने व्यक्तिले हाते बन्दुक प्रयोग गरेको थियो । त्यसपछि उक्त व्यक्ति घटनास्थलबाट फरार भएको थियो ।
गोली चलाउने व्यक्तिको उक्त स्टोरसँग सम्बन्ध समेत रहेको बुझिएको छ । या त पूर्व कर्मचारी या त अहिलेपनि काम गर्ने कर्मचारी रहेको हुनसक्ने बताइएपनि थप जानकारी सार्वजनिक भएको छैन । गोलीकाण्ड काम सम्बन्धित भएको हुनसक्ने जनाइएको छ ।
मंगलबार विहान ११ बजेर २० मिनेटमा प्रहरीले गोली चलाउने व्यक्तिको पहिचान गरेको थियो । त्यसपछि खोजी कार्य जारी गरिएको थियो । तीनबजे उक्त व्यक्तिलाई पक्राउ गरिएको थियो ।