राष्ट्रपति बाइडेनले अप्रिल २८ मा संसदको संयुक्त सदनमा पहिलो सम्बोधन गर्ने
प्रकाशित मिति : बैशाख १, २०७८ बुधबार
अमेरिकी राष्ट्रपति जो बाइडेनले आगामी अप्रिल २८ मा संसदको संयुक्त सदनमा सम्बोधन गर्ने भएका छन् । हाउस स्पीकर न्यान्सी पेलोसीले संयुक्त सदनलाई सम्बोधनका लागि पठाएको निमन्त्रणा बाइडेनले स्वीकार गरेका हुन् । यो सम्बोधन आधिकारिक स्टेट अफ द युनियन सम्बोधन भने होइन । किनभने संसदसमक्ष राष्ट्रपतिको पहिलो सम्बोधनलाई स्टेट अफ द युनियन सम्बोधन मान्ने चलन छैन ।
‘झण्डै एकसयदिन अगाडि जब तपाईले कार्यभार सम्हाल्नुभयो । तब तपाईले ठूलो आशाको भावनाका साथ सहायता आउँदै गरेको प्रतिबद्धता जनाउनुभएको थियो । अहिले तपाईको ऐतिहासिक नेतृत्वको कारण सहायता आइसकेको छ ।’ पेलोसीले बाइडेनलाई लेखेको पत्रमा उल्लेख छ ।
ह्वाइट हाउसले अफगानिस्तानबाट आगामी सेप्टेम्बर ११ सम्म सबै सेना फिर्ता गर्ने घोषणा गरेकै दिन पेलोसीको पत्र बाइडेनलाई प्राप्त भएको हो । अमेरिकामा भएको सेप्टेम्बर ११ को आतंककारी हमलाको २० औं बार्षिकीमा अफगानिस्तानबाट सबै अमेरिकी सेना फिर्ता गर्ने ह्वाइट हाउसले घोषणा गरेको हो ।
सपथ ग्रहण समारोहको सम्बोधन जस्तै संसद समक्ष बाइडेनको पहिलो सम्बोधनमा पनि कोरोना महामारी लगायतका विषय समेटिने अपेक्षा गरिएको छ । कोरोना महामारीका कारण सम्बोधनका क्रममा च्याम्बरमा सांसदहरुको संख्या सिमित गरिनेछ । बाँकीले हाउस फ्लोर र ग्यालरीमा बसेर सम्बोधन सुन्नेछन् । सांसदहरुका पाहुनालाई पनि अनुमति छैन ।
बाइडेनले संयुक्त सभालाई सम्बोधन गर्न उत्सुक रहेको ह्वाइट हाउस प्रेस सेक्रेटरी जेन पास्कीले बताएकी छिन् । कोरोना महामारीसँगको लडाई, विश्वब्यापी चुनौतिहरुको सम्बोधन, आर्थिक रिकभरी लगायतका विषयमा छलफल हुने जनाइएको छ । रिपब्लिकनहरुले छिट्टै आफ्नो प्रतिकृया जनाउने अपेक्षा गरिएको छ ।