बेष्ट भर्जिनिया बसाई सर्नेलाई राज्यले १२ हजार डलर नगद दिने
प्रकाशित मिति : चैत्र ३०, २०७७ सोमबार
अब बेष्ट भर्जिनिया बसाई सरेर घरमै बसेर रिमोट वर्क गर्नेहरुलाई १२ हजार डलर नगद दिने राज्यले घोषणा गरेको छ । कुनै शर्त विना नै १२ हजार डलर र राज्यका पार्क लगायतका मनोरञ्जनका क्षेत्रमा प्रवेशका लागि २५ सय डलरसम्मको निशुल्क पास समेत प्रदान गरिने भएको छ ।
सबै सुविधाहरु थप गर्दा प्रतिव्यक्ति २० हजार डलरसम्मको हुने वेष्ट भर्जिनियाले जनाएको छ । इन्टुईटका कार्यकारी अध्यक्ष ब्राड स्मीथ र उनकी पत्नीले २५ मिलियन डलर डोनेशन गरेकाले यो अफर सम्भव भएको हो ।
कोरोनाको महामारीका कारण कैयन कम्पनीहरुले कामदारहरुलाई घरमै बसेर काम गर्न वा हाइब्रिड तरिकाले काम गर्न अनुमति दिएकाले त्यस्ता कामदारहरुले वेष्ट भर्जिनिया बसाई सरेर फाइदा लिनसक्ने भएका छन् । फेसबुक, ट्वीटर, एप्पल लगायतका कैयन कम्पनीहरुले आफ्ना कामदारहरुलाई घरमै बसेर काम गर्ने सुविधा दिएका छन् ।
यस्तो सुविधा पाइसकेपछि कैयन कामदारहरु सस्तो राज्यहरुमा बसाई सराई गरिरहेका छन् । सस्तोमात्र नभई जीवनयापनको गुणस्तरसमेत राम्रो बनाउनका लागि यसरी बसाई सराई गर्नेहरुलाई विभिन्न राज्यहरुले विभिन्न अफरहरु दिने गरेका छन् ।
एउटा अध्ययन अनुशार अध्ययनमा सहभागी ८२ प्रतिशत कम्पनीहरुले आफ्ना कामदारहरुले घरमै बसेर काम गर्नदिने आशय व्यक्त गरेका छन् । साथै ४७ प्रतिशतले आफ्ना कामदारहरुलाई घरमै बसेर स्थायी रुपमा नै काम गर्नदिने योजना बनाएका छन् ।