बेलायती महारानीका पति ‘प्रिन्स फिलिप’ को ९९ वर्षमा निधन
प्रकाशित मिति : चैत्र २७, २०७७ शुक्रबार
महारानी एलिजाबेथ द्वितीयाका श्रीमान् राजकुमार फिलिपको ९९ वर्षको उमेरमा निधन भएको बकिङ्घम राजदरबारले घोषणा गरेको छ। उनको शुक्रबार बिहान ९९ वर्षको उमेरमा निधन भएको हो ।
महारानी र पति फिलिपको निवास रहेको विन्डसर क्यासलमा उनको निधन भएको हो ।गहिरो दुखका साथ रानीले उनका श्रीमान् ड्यूक अफ एडिनबरा राजकुमार फिलिपको मृत्यु भएको घोषणा गरेकी बकिङहम राजदरबारले जारी गरेको विज्ञप्तिमा छ ।
गत महिना द ड्यूक अफ एडिनबरा एक महिना अस्पताल बसेर डिस्चार्ज भएका थिए। राजकुमार फिलिपले राजकुमारी एलिजाबेथसँग सन् १९४७ मा बिहे गरेका थिए। विवाहको ५ वर्षपछि एलिजावेथ महारानी घोषित भएकी थिइन् ।
राजकुमार फिलिपको जन्म सन् १९२१ को जुन १० तारिखमा ग्रीक आइल्यान्ड ‘कोर्फु’ मा भएको हो । महारानी र राजकुमार फिलिपका ४ सन्तानका साथै ८ नाती-नातिना र १० पनाती-पनातिना छन् ।
बेलायती प्रधानमन्त्री बोरिस जोन्सनले राजकुमार फिलिपको निधनमा दु:ख व्यक्त गरेका छन् । उनले जीवनमा अनगिन्ती युवाहरुलाई प्रेरित गरेको उल्लेख गर्दै प्रधानमन्त्रीले बेलायतीहरुमाझ राजसंस्था आजको अवस्थामा रहनुमा उनको विशेष योगदान रहेको स्मरण गरेका छन् ।
उनीहरूका छोरा प्रिन्स अफ वेल्स राजकुमार चार्ल्स सन् १९४८ मा जन्मेका थिए। त्यसपछि राजकुमारी एन् सन् १९५० जन्मेकी थिइन्, ड्यूक अफ योर्क राजकुमार एन्ड्रयू सन् १९६० मा जन्मेका थिए र अर्ल अफ वेसेक्स प्रिन्स एडवार्ड सन् १९६४ मा जन्मेका थिए।
प्रिन्स फिलिप ग्रीसको कोर्फु द्वीपमा १० जुन सन् १९२१ मा जन्मिएका थिए। उनी हेलेन्सका राजा जोर्ज प्रथमका कान्छा छोरा थिए। उनकी आमा, राजकुमारी एलिस, लर्ड लुइ अफ ब्याटनबर्गकी छोरी र रानी भिक्टोरियाका पनातिनी थिइन्।