न्युयोर्क सिटी प्रहरीका डेपुटी इन्सपेक्टरले गाडीभित्र आफैलाई गोली हानेर लिए ज्यान
प्रकाशित मिति : चैत्र २४, २०७७ मंगलबार
न्युयोर्क सिटी प्रहरीका १०७ औं चौकी कमाण्डरले सोमबार क्वीन्सको किसेना पार्क नजिकै प्रहरीकै गाडीभित्र आफैलाई गोली हानेका छन् । डेपुटी इन्सपेक्टर डेनिस मुलानीले गाडीभित्र बसेर आफ्नो टाउकोमा गोली हानेका हुन् ।
ब्रुकलिन क्वीन्स ग्रिनवे नजिकै अण्डरहिल एभिन्युमा गाडीभित्र बसेर आफ्नो टाउकोमा पिस्तोल ताकेर ट्रिगर दबाएका उनलाई तत्कालै नजिकको अस्पतालमा लगिएको थियो । तर पनि उनलाई बचाउन सकिएन । अस्पतालले उनलाई मृत घोषणा गरेको छ ।
उनले आफैमाथि गोली चलाउनु भन्दा केहीबेर अगाडि परिवारलाई फोन गरेका थिए । त्यसपछि प्रहरीले उनलाई खोज्दै गर्दा उनले गोली चलाइसकेका थिए । यो घटना न्युयोर्क प्रहरीले आफ्नै ज्यान लिएको यो बर्षको पहिलो घटना हो ।
यसअगाडि गतबर्षको अगस्तमा न्युयोर्क सिटीका प्रहरी अधिकारी रिचार्ड क्याटापानोले ड्युटीमा नरहेको अवस्थामा टाउकोमा गोली हानेर आफ्नै ज्यान लिएका थिए । मार्चमा एकजना न्युयोर्क प्रहरीका ट्रान्जिट अधिकारीले आफ्नै टाउकोमा गोली हान्दा ज्यान गएको थियो ।
सन् २०२० को फेबु्रअरीमा डिटेक्टिभ पउल फेडरिको क्वीन्समा झुण्डिएको अवस्थामा फेला परेका थिए । सन् २०१९ मा १० जना प्रहरीले आफ्नो ज्यान लिएका थिए ।