रक्तपातपूर्ण शनिबार: म्यानमारमा सेनाको गोलीबाट एकैदिनमा बालबालिकासहित ११४ मारिए
प्रकाशित मिति : चैत्र १४, २०७७ शनिबार
शनिबारमात्रै म्यानमारमा भएका प्रदर्शनमा बालबालिकासहित कम्तीमा ११४ जना मारिएका छन् । सेनाले सत्ता कब्जा गरेयताकै सबैभन्दा धेरै एकैदिनमा शनिबार मारिएको जनाइएको छ ।
जुन्ताको सैन्य शक्तिले शान्तिपूर्ण प्रदर्शनहरुमाथि आक्रमण गर्ने र गोली चलाउने गरिरहेको छ । देशभरका ४४ वटा सिटी र टाउनहरुमा भएका प्रदर्शनहरुमा सेनाले गोली चलाएर उनीहरुको हत्या गरेको हो ।
मारिनेमा एकजना १३ बर्षकी बालिका समेत छिन् । सेनाले आवासीय क्षेत्रमा गोली चलाउँदा घरमै रहेकी ती बालिकामाथि गोली लागेको थियो । प्रदर्शनहरु सुरु भएयता म्यानमारका कम्तीमा पनि २० जना बालबालिकाहरुको मृत्यु भइसकेको छ । २ महिनामा मारिने सबैभन्दा कम उमेरका ५ बर्षका बालक छन् ।
सरकार नियन्त्रित टेलिभिजनले प्रदर्शनमा उत्रनेहरुलाई टाउको र पिठ्युमा गोली हान्न सकिने बताएको थियो । तर पनि प्रदर्शनकारीहरु सडकमा निस्केपछि सेनाले निर्मम तरिकाले गोली चलाएको हो ।
संयुक्त राष्ट्रसंघका महासचिवले शनिबारको हिंशाको निन्दा गरेका छन् । हिंशा अस्वीकार्य भएको र तुरुन्तै रोकिनुपर्ने राष्ट्रसंघले वक्तब्यमार्फत जनाएको छ । फरबरी १ मा सेनाले सत्ता कब्जा गरेयता म्यानरमा कम्तीमा ४४० जना मारिएका छन् ।